Zelenskiy Putin bilan muzokaralar boshlash shartini e’lon qildi

Ukraina prezidenti Vladimir Zelenskiy Reuters va CNN’ga bergan intervyusida Rossiya prezidenti Vladimir Putin bilan muzokaralar o‘tkazishga tayyor ekanini ma’lum qildi. To‘liq video Ukraina yetakchisining Facebook’dagi sahifasida e’lon qilingan.

“Dunyo Rossiya prezidenti bilan muzokaralar stolida o‘tirishga hali tayyorlar bor vaqtda uni muzokaralar stoliga o‘tqazish kerakligini tushunib turibdi va men ham”, — deydi Zelenskiy.

Shu bilan birga, davlat rahbari Rossiya tomoni bilan muzokaralar boshlashning dastlabki shartlarini aytib o‘tgan. “Eng kamida odamlarni bombardimon qilishni to‘xtatish kerak, shunchaki bombardimonni to‘xtatish va shundan so‘ng muzokaralar stoliga o‘tirish lozim”, — deydi u.

Zelenskiyning ma’lum qilishicha, ukrainaliklar “umrining oxirigacha” kurashadi. “Chunki biz o‘z uyimizdamiz. Biz bolalarimiz, uyimizni himoya qilyapmiz. Biz buni chin ko‘ngildan amalga oshiryapmiz. O‘ylaymanki, bugungi kunda o‘zlari himoyaga muhtoj bo‘lgan farzandlarimiz kelajagi uchun barchasini himoya qilishimiz kerak”, — deydi prezident.

Zelenskiy, shuningdek, NATOga a’zo davlatlarni Ukrainaning harbiy alyansga qabul qilinish istiqboli bor yoki yo‘qligi bo‘yicha aniq javob berishga chaqirgan. Agarda alyans bu kabi istiqbolga tayyor bo‘lmasa, prezidentning ta’kidlashicha, NATO davlatlari Ukraina hududi va chegaralari daxlsizligi uchun huquqiy xavfsizlik kafolatlarini berishi kerak.

Avvalroq internetda Xarkovdagi Ozodlik maydoniga yo‘llangan raketa hujumining videolari tarqalgan, Zelenskiy ushbu hujumni ochiqdan ochiq terror deb atagandi.

Eslatib o‘tamiz, Ukraina va Rossiya delegatsiyasining maxsus operatsiyalar boshlanganidan keyingi birinchi uchrashuvi 28-fevral kuni Belarusning Gomel viloyatida bo‘lib o‘tdi. Xavfsizlik nuqtayi nazaridan uchrashuvning aniq joyi oshkor etilmadi. Ukraina prezidenti Vladimir Zelenskiyning ma’lum qilishicha, Rossiya bilan muzokaralar davomida Ukraina xohlagan natijaga erishish imkoni bo‘lmagan.