Qashqadaryo viloyatining Dehqonobod tumanida hokim yordamchisi tashabbusi bilan suvsizlik muammosidan qiynalayotgan 615 ta xonadonning ichimlik suvi bilan bog‘liq muammosi hal etilmoqda. Bu haqda “Daryo”ga tuman hokimligi axborot xizmati xabar berdi.
Qayd etilishicha, tumanning Oqirtma qishlog‘ida ish boshlagan hokim yordamchisi Husniddin Jumayev tashabbusi bilan hududda bir vaqtning o‘zida 400 metr/kub ichimlik suvi to‘planadigan hovuz qurilmoqda.
“Oqirtmada yoz faslida ichimlik suvi bilan bog‘liq muammo yuzaga kelardi. Qishloqqa 54 kilometr uzoqlikda joylashgan Torqopchug‘ay qishlog‘idan suv keltiriladi. Biroq yo‘lda Oqirtmadan tashqari yana beshta qishloq borligi, shuningdek, qishloqdagi mavjud hovuz sig‘imi kamligi bois yig‘ilgan suv aholiga yetmasdi. Shu bois qishloq ahli yozda suvsizlikka duch kelardi. 2021-yilda esa suvning tonnasini 40 ming so‘mdan sotib olib ichishga ham majbur bo‘lgan. Hokim yordamchisi sifatida ish boshlaganimdan so‘ng, eng avvalo shu muammoga yechim topishga urindim. Aholi jonkuyar va fidoyi bo‘lgani bois tashabbusimni qo‘llab-quvvatlab, hashar yo‘li bilan bir vaqtning o‘zida 4 ming metr/kub suv to‘planadigan, 1977-yil qurilgan va ayni kunda yaroqsiz holga kelib qolgan hovuzni ta’mirlashga kirishdik. Tez orada hovuzimiz ishga tushib, qishloq ahlini qiynab kelayotgan suv muammosi yechimini topadi”, — deydi hududda ish boshlagan hokim yordamchisi Husniddin Jumayev.
Hokim yordamchisining qo‘shimcha qilishicha, hovuz ta’miri uchun sarflanishi ko‘zda tutilgan 150 million so‘m mablag‘ aholining shaxsiy mablag‘i, shuningdek homiy tadbirkorlar yordamida to‘plangan bo‘lib, aholi o‘z muammosiga o‘zi yechim topgan.
“Mazkur hovuz ishga tushsa, qishloqdagi 615 ta xonadonda yashovchi 3582 nafar aholining ichimlik suvi bilan bog‘liq muammosi yechimini topadi. Va Torqopchug‘aydan kelayotgan suv uvol bo‘lmay, bir vaqtning o‘zida 4 ming metr/kub suv zaxirasi yaratiladi. Va qishloq aholisi yozda suvsizlik muammosiga duch kelmaydi”, — deydi Dehqonobod suv ta’minoti korxonasi boshlig‘i Suyun Allanazarov.
Tuman hokimligi axborot xizmatining qo‘shimcha qilishicha, tuman hokimi Zoir Aliqulov Husniddin Jumayev tashabbusini qo‘llab-quvvatlab, shu qishloq uchun suv tarqatish shoxobchasi qurib berilishini o‘z zimmasiga olgan.
Izoh (0)