Amerikaning Boeing kompaniyasi Rossiya aviakompaniyalaridagi samolyotlariga ehtiyot qismlar yetkazib berish va ularga texnik xizmat ko‘rsatishni to‘xtatishini ma’lum qildi, deb xabar beradi “Interfaks”.
OAV ma’lumotlariga ko‘ra, Boeing Ukrainadagi vakolatxonasini ham yopgan, Moskvadagi uchuvchilarni tayyorlash o‘quv markazi faoliyatini to‘xtatgan.
Xabarda ta’kidlanishicha, o‘tgan dam olish kunlari kompaniya o‘z mijozlariga ular potensial Rossiya va Ukrainadagi konstruktorlik markazlarida samolyotlarga texnik xizmat ko‘rsatish va ta’mirlash borasidagi so‘rovlar borasida kechikishlar bo‘lishi mumkinligini xabar bergan.
Shuningdek, AQSh prezidenti Jo Bayden Ukrainadagi harbiy operatsiyalar sabab Rossiya uchun havo makonini yopishini e’lon qildi.
“Bugun kechqurun biz ittifoqchilarimizga qo‘shilib, Amerika havo hududini Rossiyaning barcha parvozlari uchun yopishimizni e’lon qilaman”, — deydi Bayden Kongressga murojaatida.
Rossiyaga qarshi bir qator davlatlar, xususan, YI, AQSh, Kanada, Yaponiya, Avstraliya va boshqa mamlakatlar sanksiyalar joriy etgan. Cheklovlar Rossiya banklari (“VTB” va “Sberbank” ham bor), Rossiyadan yuqori texnologiya mahsulotlarini eksport qilish, Markaziy bank, Moliya vazirligi, Rossiya taraqqiyot jamg‘armasi va katta davlat korporatsiyalari, Rossiya Xavfsizlik kengashi a’zolari, Davlat dumasi deputatlariga nisbatan ham tatbiq qilingan.
28-fevralda Vladimir Putin AQSh hamda boshqa g‘arb davlatlarining do‘stona bo‘lmagan harakatlari va xorij davlatlari, xalqaro tashkilotlarning cheklovlariga qarshi iqtisodiy chora-tadbirlar to‘g‘risida farmonni imzolagan.
Shuningdek, Buyuk Britaniya hukumati Ukrainadagi urushdagi bilvosita ishtiroki sabab Belarus mudofaa vazirining to‘rt o‘rinbosari hamda mamlakatning ikki mudofaa muassasasini sanksiyalar ro‘yxatiga qo‘shib qo‘ygan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)