28-fevral kuni Oliy Majlis Senatining Koreya Respublikasi Milliy assambleyasi bilan hamkorlik bo‘yicha komissiyasining birinchi majlisi bo‘lib o‘tdi. Majlisni Senat raisi Tanzila Norboyeva olib bordi.
Qayd etilishicha, majlisda O‘zbekiston Respublikasi prezidentining 2021-yil 28-dekabrdagi “O‘zbekiston Respublikasi va Koreya Respublikasi o‘rtasidagi alohida strategik sheriklik munosabatlarini yanada chuqurlashtirish chora-tadbirlari to‘g‘risida”gi PQ-67-sonli qarori bilan tasdiqlangan qator amaliy harakatlar rejalari (“yo‘l xaritalari”) ijrosining borishi muhokama qilindi.
Prezidentning 2021-yil 16—18-dekabr kunlari Koreyaga amalga oshirgan davlat tashrifi doirasida salmoqli ikki tomonlama o‘zaro manfaatli bo‘lgan kelishuvlarga erishildi.
Xususan, axborot-kommunikatsiya texnologiyalaridan keng foydalangan holda ijtimoiy-iqtisodiy sektorni raqamlashtirish, “yashil energetika” tizimini rivojlantirish hamda kuchli ijtimoiy siyosatni amalga oshirish O‘zbekiston Respublikasining Koreya Respublikasi bilan hamkorlik aloqalarida uzoq muddatga mo‘ljallangan yangi ustuvor yo‘nalishlari etib belgilandi.
Koreya Respublikasi O‘zbekistonning asosiy savdo-iqtisodiy hamkorlaridan biri hisoblanib, keyingi yillarda tovar ayirboshlash va qo‘shma korxonalar soni qariyb ikki baravarga ortdi.
Janubiy Koreyaning O‘zbekistonga investitsiyalari hajmi 7 mlrd dollardan ortdi. 2021-yilda 320 million dollar, ya’ni 2020-yilga nisbatan 20 foiz ko‘p mablag‘ o‘zlashtirildi. Bu mablag‘lar hisobiga kimyo, neft-kimyo, to‘qimachilik, qurilish, qishloq xo‘jaligida qo‘shma loyihalar amalga oshirilmoqda.
Koreya Respublikasi Eksport-Import (Eksim) banki hamda Iqtisodiy taraqqiyot va hamkorlik jamg‘armasi (EDCF) bilan ko‘p yillik samarali hamkorlik natijasida mamlakatimizning investitsiya loyihalarini moliyalashtirish hajmi 1 milliard dollarga yetkazildi.
O‘zbekiston Respublikasi va Koreya Respublikasi o‘rtasida ikki tomonlama va ko‘p tomonlama parlamentlararo aloqalarni kengaytirish, shuningdek davlatlararo ikki tomonlama imzolangan kelishuv va bitimlarni amalga oshirish bo‘yicha “yo‘l xaritalari”da belgilangan vazifalarning borishi ustidan tizimli parlament nazoratini o‘rnatish maqsadida Senatning 2022-yil 3-fevraldagi SQ-473–IV-son qarori bilan Oliy Majlis Senatining Koreya Respublikasi Milliy assambleyasi bilan hamkorlik bo‘yicha komissiyasi tashkil etildi.
Majlisda O‘zbekiston Respublikasi prezidentining 2021-yil 28-dekabrdagi PQ-67-sonli qarori bilan tasdiqlangan 3 ta amaliy harakatlar rejalari (“yo‘l xaritalari”) ijrosining borishi, shu jumladan joriy yil yanvar oyida bajarilishi belgilangan 23 ta vazifaning ijrosi muhokama qilindi.
Tadbir davomida ikki mamlakat o‘rtasida diplomatik munosabatlar o‘rnatilganligining 30 yilligiga bag‘ishlangan “O‘zaro almashinuvlar yili”ni tashkil etish, Senat faoliyatida Janubiy Koreya parlamenti tajribasi asosida “Elektron parlament” mexanizmini tatbiq qilish bo‘yicha dolzarb vazifalar belgilandi.
Majlis yakunida bildirilgan fikr-mulohazalar va takliflarni inobatga olgan holda komissiyaning tegishli qarori qabul qilindi.
Izoh (0)