1-mart kuni O‘zbekiston sog‘liqni saqlash vaziri Behzod Musayev hamda YUNISEFning O‘zbekistondagi vakolatxonasi rahbari Munir Mamedzade tomonidan 2022—2025-yillarga mo‘ljallangan “yo‘l xaritasi” imzolandi. Bu haqda SSV matbuot xizmati xabar berdi.
Mazkur hujjat mamlakatda sog‘liqni saqlash tizimini rivojlantirishga doir umumiy qiymati 102,5 million dollarilik qo‘shma chora-tadbirlarni o‘z ichiga oladi. U to‘rt asosiy yo‘nalishdan iborat.
Dastlabki yo‘nalish — O‘zbekistonda perinatal xizmatlar ko‘rsatish sifatini yanada yaxshilash bilan bog‘liq dolzarb vazifalarga qaratilgan. Onalik va bolalikni muhofaza qilishga ixtisoslashgan tibbiyot xodimlarining bilim va malakasini oshirish, davolash muassasalalarini zamonaviy tibbiy asbob-uskunalar bilan jihozlash, kam vaznli chaqaloqlar hayotini saqlab qolishdek muhim chora-tadbirlar shular jumlasidan.
Ikkinchi yo‘nalish — milliy kalendarga kiritilgan vaksinalar bilan bolalarni emlash, mavjud sanitar punktlarni zamonaviy uskunalar bilan jihozlash, u orqali mamlakatda immunizatsiya jarayonlarini takomillashtirish kabi vazifalarni o‘z ichiga oladi.
Qolaversa, Qoraqalpog‘iston Respublikasidagi qator umumta’lim maktablarining sanitariya-gigiyena holati hamda o‘quvchilarning salomatligi uchun muhim bo‘lgan suv ta’minotini yaxshilashga yo‘naltirilgan yirik loyihalar amalga oshiriladi. Shuningdek, bolalarda yod yetishmovchiligi, kamqonlikning oldini olish singari qator masalalar yechimi ham ko‘zda tutilgan.
Uchinchi yo‘nalish — onalar va bolalarning ovqatlanishini yaxshilashga qaratilgan chora-tadbirlardan iborat. Ular orasida 6—23 oylik bolalar va 35 yoshgacha bo‘lgan xotin-qizlarni temir hamda foli kislotasi bilan ta’minlash, umumta’lim maktablarida ovqatlanish standartlarini ishlab chiqish kabi dolzarb vazifalar ham bor.
So‘nggi yo‘nalish — o‘smirlarga tibbiy xizmat ko‘rsatish sifatini oshirishni nazarda tutadi. Buning doirasida maktab o‘quvchilari salomatligi bilan bog‘liq milliy strategiya ishlab chiqish, shu yoshdagi o‘g‘il-qizlarga xizmat ko‘rsatuvchi tibbiyot xodimlari uchun o‘quv dasturlari tayyorlash, yoshlar o‘rtasida sog‘lom turmush tarzini targ‘ib etuvchi platforma yaratish kabi loyihalar ro‘yobga chiqariladi.
Umuman, ikki tomonlama imzolangan “yo‘l xaritasi” ijrosi O‘zbekistonda onalar va bolalar salomatligini mustahkamlash, shu yo‘nalishda faoliyat yurituvchi tibbiyot xodimlarining bilim va tajribasini yanada oshirishga xizmat qiladi.
Avvalroq koronavirusga qarshi kurash uchun ajratilgan mablag‘larning sarflanishi bo‘yicha Behzod Musayevga parlament so‘rovi yuborilgani, Yaponiya Termiz tumanidagi tibbiyot muassasalarining suv ta’minotini yaxshilashga yordam berishi to‘g‘risida xabar berilgandi.
Izoh (0)