“Rossiyaga qarshi qo‘llanilgan keskin sanksiyalarning muqobili — Uchinchi jahon urushining boshlanishi bo‘lishi mumkin edi” — Bayden

AQSh prezidenti Jo Bayden bloger Brayan Koenga bergan intervyusida Rossiyaga qarshi qo‘llanilgan keskin sanksiyalarning muqobili — Uchinchi jahon urushining boshlanishi bo‘lishi mumkinligi haqida gapirdi.

“Harakatlar uchun ikki yo‘l bor edi: Rossiya bilan jismoniy jihatdan urush ochib, Uchinchi jahon urushini boshlash yoxud ikkinchi variant, ya’ni xalqaro huquqni hurmat qilmayotgan, mensimayotgan mamlakatni o‘ta qimmat tovon to‘lashga majbur qilish”, — deydi Bayden.

Shuningdek, Bayden Rossiyaga qarshi qo‘llanilgan sanksiyalar tarixdagi eng keng qamrovli cheklovlar ekanligini qayd etgan.

“Rossiya ushbu qilmishlari uchun qisqa vaqt ichida, ayniqsa, kelajakda juda jiddiy tovon to‘laydi”, — deb hisoblashini aytgan AQSh prezidenti.

24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini e’lon qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.

24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. AQSh prezidenti Jo Bayden Rossiya Ukraina hududiga bostirib kirgani va u yerda harbiy operatsiyalarni boshlagani uchun mamlakatga nisbatan yangi sanksiyalar joriy qilgan. Shuningdek, Bayden Rossiyaning Ukrainaga hujumi uchun mas’uliyat Vladimir Putinning zimmasida ekani, Rossiya ushbu harbiy operatsiya uchun jiddiy zarbalar qabul qilib olishi haqida gapirgan.

Keyinchalik 25-fevralda AQSh Putin, Lavrov va Shoyguga qarshi sanksiyalar e’lon qildi, shuningdek 26-fevralda Oq uyning Zelenskiyga Kiyevni tark etishida yordam berishga tayyorligi xabar qilindi. AQSh prezidenti Jo Bayden Ukrainaga harbiy ehtiyojlar uchun zudlik bilan moliyaviy yordam ko‘rsatishni buyurgan, Fransiya prezidenti Emmanuel Makron esa Ukrainadagi urushning uzoq davom etishini taxmin qilgan.

Hozircha Rossiyani SWIFT tizimidan uzib qo‘yish haqidagi AQSh, Buyuk Britaniya va Yevropa ittifoqining sanksiyalari hali kuchga kirgani yo‘q. Asosiy cheklovlar Rossiya elitasi, banklar, iqtisodiyotning alohida sohalari, jumladan Rossiya eksporti va yuqori texnologiyalar mahsulotlariga nisbatan tatbiq qilingan.