Uzbekistan Airways Latviyaga kirishda yangi tartib joriy etilganini ma’lum qildi

Latviyaga kirish tartibi 2022-yil 1-martdan boshlab barcha yo‘lovchilar (12 yoshdan boshlab) uchun keskin o‘zgaradi. Bu haqda Uzbekistan Airways xabar qildi.

Qayd etilishicha, 1-martdan mamlakatga kirish istagida bo‘lgan yo‘lovchilardan quyidagilar talab etilmaydi:

• Latviyaga kirish uchun sabab (ish, oilani birlashtirish, davolanish va hokazo);
• covidpass.lv shaklini to‘ldirish.

2022-yil 16-fevraldan boshlab o‘zini o‘zi izolyatsiya qilish bekor qilingan. Latviyaga kirish uchun yo‘lovchilar emlanganlik to‘g‘risidagi sertifikat yoki kasallik haqida guvohnoma taqdim etishi kerak bo’ladi.

Shu bilan birga, sertifikat Yevropa Ittifoqi hududida tan olinishi kerak. Hozirda ushbu ro‘yxatda 33 ta davlat (yoki hudud) mavjud. Aks holda, COVID-19 ga topshirilgan testning salbiy natijasi taqdim etilishi kerak.

Hujjatlar ingliz tilida qog‘oz yoki elektron shaklda (smartfonda) bo‘lishi kerak.

“Riga shahri aeroportiga yetib kelgandan so‘ng, har bir yo’lovchi ixtiyoriy ravishda davlat tomonidan to‘lanadigan koronavirus testini topshirish imkoniyatiga ega”, — deyiladi xabarda.