Milliy matbuot markazida “Olmaliq KMK” AJ faoliyatida raqamlashtirishning ahamiyatiga bag‘ishlangan matbuot anjumani bo‘lib o‘tdi. Unda kombinatda raqamlashtirish yuzasidan amalga oshirilayotgan ishlar va rejalar xususida ma’lumot berildi.
Olmaliq kon-metallurgiya kombinati mamlakatimizning eng yirik ishlab chiqarish korxonalaridan biri hisoblanadi. Kombinat konlarni ochiq va yerosti usulida qazish, boyitish va oltinni saralab olish fabrikalari, metallurgiya zavodlari, yirik energetika va transport tizimlari, rivojlangan infratuzilma hamda ijtimoiy obyektlarni birlashtirgan.
Korxona rahbariyati tomonidan ishlab chiqarish hajmi va ish samaradorligini yanada oshirish, texnik va texnologik jihozlarni qayta jihozlash va modernizatsiya qilish, yangi ishlab chiqarish obyektlarini qurish bilan birga raqamlashtirish darajasini oshirishga alohida e’tibor qaratilmoqda.
“Olmaliq KMK” AJ boshqaruvi raisining raqamlashtirish bo‘yicha o‘rinbosari Abdulla Azizovning ta’kidlashicha, bugungi kunga qadar OKMKda raqamlashtirish doirasida amalga oshirilgan ishlar natijasida bir qator yutuqlarga erishilgan.
“2021-yilda kombinatda transportni boshqarish va nazorat qilish tizimi joriy etilib, loyiha doirasida 1700 ta transport vositalariga masofaviy nazorat — GPS tizimi, shuningdek, barcha kon avtosamosvallari hamda ko‘chma yoqilg‘i quyish avtotransportlariga yoqilg‘i nazorati sensorlari o‘rnatildi. Natijada, 2021-yilda kombinat bo‘yicha qiymati 151 milliard so‘mga teng bo‘lgan 16,8 ming tonna dizel yoqilg‘isi tejab qolingan. Texnologik transporti boshqarmasida TIS axborot tizimi joriy etilishi ‘Yoshlik I’ konida tog‘ jinsini tashish hajmini o‘rtacha 10 foizga oshirishga imkon berdi. Bundan tashqari, sanoat temiryo‘l transport boshqarmasida RMS axborot tizimi joriy etilib, ushbu tizim yordamida 160 ta transport vositasi nazorat etilishi yo‘lga qo‘yildi. Natijada temir yo‘l vagonlarini normadan ortiq to‘xtashlari oldi olinib, jarima to‘lovlari 6-martaga kamaytirilishiga erishildi”, — dedi A. Azizov.
Ma’lumki, O‘zbekiston Respublikasi Prezidenti Shavkat Mirziyoyev tomonidan, 2020-yil 5-oktabr kuni “‘Raqamli O‘zbekiston — 2030’ strategiyasini tasdiqlash va uni samarali amalga oshirish chora-tadbirlari to‘g‘risida”gi farmon imzolangan. Farmon bilan tasdiqlangan “Raqamli O‘zbekiston — 2030” milliy strategiyasi doirasida kombinat mutaxassislari tomonidan “Raqamli OKMK — 2030” rivojlanish konsepsiyasi ishlab chiqilgan.
2022-yilning yanvar oyida konsepsiya doirasida barcha ko‘zda tutilgan loyihalarni amalga oshirish maqsadida, raqamlashtirish bo‘yicha boshqaruv raisining o‘rinbosari (Chief Digital Officer) lavozimi joriy etilgan.
“Prezidentimiz Shavkat Mirziyoyevning 2021-yil 22-dekabr kuni Olmaliqqa tashrifi va unda belgilangan “Olmaliq KMK” AJni transformatsiya qilish doirasida kombinat buyrug‘i bilan biznes jarayonlari va texnologik jarayonlarini avtomatlashtirish darajasini oshirish maqsadida 2022-yil uchun 234 milliard so‘mlik 27 ta loyihadan iborat chora-tadbirlar rejasi tasdiqlandi. Bundan tashqari, kombinat resurslarini samarali boshqarish va ishlab chiqarish jarayonlari avtomatlashtirish maqsadida ERP va MES tizimini joriy etish loyihalari ustida ish olib borilmoqda. Shu bilan birga, Angren kon boshqarmasi “Qizil-olma” va “Razvedochnaya” kon shaxtalarida “Tog‘-kon dispetcheri” dispetcherlik nazoratining avtomatlashtirilgan tizimini joriy qilish, “Yoshlik-I” va “Qalmoqqir” konlarida raqamli texnologiyalarni qo‘llagan xolda ishlab chiqarish jarayonlarini optimallashtirish va unumdorligini oshirish kabi bir qator ishlar bajariladi”, — deb ma’lumot berdi A. Azizov.
OKMKda raqamlashtirish loyihalarining amalga oshirilishi bilan bir qator natijalar kutilmoqda:
- kombinat biznes jarayonlarining yagona axborot platformasi (ERP tizimi) va tizimlar integratsiyasi ta’minlanadi;
- marksheyder, konchi va geologlar uchun konning yagona raqamli ma’lumotlar bazasi yaratiladi va xalqaro JORC kodeksi asosida zaxiralarning hisobga olish aniqligi oshiriladi;
- kon ishlarini bajarishda tezkor boshqaruv tizimi tashkil etiladi va tog‘ jinsini tashish hajmi 10 foizga oshirilib, konlarda ekspluatatsion xarajatlar 5—10 foizga, yonilg‘i sarfi 10 foizga kamaytiriladi;
- yerosti konlarda texnika xavfsizligi oshiriladi;
- barcha xujjatlar faqat elektron shaklda yuritiladi;
- axborot-kommunikatsiya infratuzilmasi takomillashtiriladi va axborot xavfsizligi ta’minlanadi.
Izoh (0)