Ukraina Milliy banki vakolatli muassasalarga Rossiya va Belarus rubllaridan foydalangan holda har qanday valyuta operatsiyalarini amalga oshirishni taqiqladi, deb xabar beradi “Interfaks”.
Shuningdek, regulyator Rossiya yoki Belarusdagi yuridik va jismoniy shaxslar oldidagi majburiyatlarni bajarishga taqiq joriy etgan.
24-fevral kuni Rossiyaning Ukrainadagi harbiy amaliyoti boshlanishi fonida Milliy bank mamlakatda valyuta bozori ishini to‘xtatgan, hisob raqamlardan “ish haqi va ijtimoiy imtiyozlarni hisobga olmaganda” 100 ming grivnadan ortiq naqd pul yechishni cheklagandi.
Eslatib o‘tamiz, 23-fevralda AQSh Rossiya DXR va LXR mustaqilligini tan olgani uchun unga qarshi sanksiyalar joriy qilgan. Rossiya rivojlanish davlat korporatsiyasi va Promsvyazbank, ularning sho‘ba tuzilmalari (SSKA futbol klubi ham) va rossiyalik yuqori lavozimdagi amaldorlarning uch o‘g‘li sanksiyalar ro‘yxatiga tushgan.
Bundan tashqari, LXR va DXR mustaqilligini tan olgan Rossiyaga qarshi Yevropa ittifoqi, Avstraliya, Kanada, Yaponiya kabi davlatlar ham sanksiyalar joriy etgan. DXR hamda LXR mustaqilligini tan olish uchun ovoz bergan Davlat dumasining 351 nafar deputatiga ham Yevropada cheklovlar belgilangan. YI Rossiya mafkurasi targ‘ibotchilari, harbiylar va boshqa amaldorlarga ham sanksiyalar qo‘llagan.
24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. Kanada Putinning atrofidagilar, deputatlar va Rossiyaning 27 ta moliyaviy institutiga qarshi sanksiyalar kiritdi.
Rossiya—Ukraina urushiga oid tezkor, ishonchli yangiliklar va ma’lumotlarni Daryo’ning live sahifasi orqali kuzatib boring → @Daryo_Live
Izoh (0)