22-fevral kuni Navoiy viloyatida foydali qazilmalarni qazib olish faoliyati bilan litsenziyasiz shug‘ullanib kelgan shaxslar qo‘lga olindi. Bu haqda viloyat IIB axborot xizmati “Daryo”ga ma’lum qildi.
Ma’lum qilinishicha, viloyat IIB JQB UJQKB, Zarafshon shahar IIB, Milliy gvardiya va FVB xodimlari bilan hamkorlikda o‘tkazilgan tezkor tadbir davomida Navoiy viloyatining Xatirchi, Navbahor, Samarqand viloyatining Narpay va Paxtachi tumanlaridan, Buxoro viloyatining Shofirkon va Vobkent tumanlaridan bo‘lgan 7 ta guruh tarkibida 54 nafar fuqaro oltin qazib olish bilan noqonuniy shug‘ullangani aniqlangan.
Ushbu fuqarolardan 4 dona “dvijok”, 7 dona “perforator”, 2 ta Ford rusumli transport vositasi, 2 tonna og‘irlikdagi tarkibida oltin zarralari bo‘lgan tosh-qumlar, shuningdek, qumlarni solishga mo‘ljallagan qoplar, arqonlar, elektr kabellari, dizel va benzin yonilg‘ilari, ketmon va belkuraklar, qo‘lbola usulda tayyorlangan tosh maydaluvchi qurilmalar tegishli tartibda xolislar ishtirokida hujjatlashtirilib olingan.
Tergovga qadar tekshiruv harakatlari davomida 54 nafar fuqaroning shaxslariga aniqlik kiritilib, tushuntirish xatlari hamda barmoq izlaridan na’munalar olingan. Daliliy ashyo sifatida olingan 2 tonna ruda qumlari tarkibida qancha miqdorda oltin borligini aniqlash maqsadida NKMKga tegishli labaratoriyaga topshirilgan.
Navoiy viloyati IIB axborot xizmati rahbari O‘ktam Usmonovning ma’lum qilishicha, Konimex tumani markazidan qariyb 200—220 kilometrcha olis bo‘lgan cho‘l hududida “Karakata” ovuli bor. Ushbu ovulning “Lolazor” massivini, ya’ni eski tillo koni mahalliy tilda “odam qadami yetmas ovloq yerlar” deyiladi. Buxoroning G‘ijduvon, Shofirkon, Vobkent, Navoiyning Konimex, Navbahor, Samarqandning Narpay va Paxtachi tumanlarining ko‘plab chekka hudud aholisi bu ovloq yerlarni go‘yoki o‘zlashtirib olgan.
“Odamlar ‘Karakati’ ovuliga olib boradigan manzilga tomon o‘zboshimchalik bilan o‘ndan ortiq yo‘llar ochishgan. Turli xildagi yuk tashish mashinalari, hatto, eshakaravalar izlaridan paydo bo‘lgan bu yo‘llar orqali Navoiy tog‘-metallurgiya kombinatidan chiqarib tashlanadigan qumlarni tashib kelishgan. Bu qonunbuzarliklarning oldini olish uchun doimiy qo‘shimcha kuch ajratilmagan, postlar tashkil qilinmagan”, — deydi O‘ktam Usmonov.
Matbuot kotibining so‘ziga ko‘ra, tillo kukuni o‘g‘irlashning va uning ortidan sodir etilayotgan jinoyatlarning oldini olish uchun tizimda qo‘shimcha shtatlar yaratilishi, kuchlar mustahkamlanishi kerak.
Avvalroq Navoiyda oltinni noqonuniy kovlab olishga uringan 5 kishini tuproq bosib qolgani, ularning jasadi chuqurlikda qariyb 2 hafta qolib ketgani to‘g‘risida xabar berilgandi.
Izoh (0)