Ukraina prezidenti Vladimir Zelenskiy mamlakat Milliy xavfsizlik va mudofaa kengashi yig‘ilishini chaqirdi, deya xabar bermoqda “Ukrainskaya pravda” kengash kotibi Oleksiy Danilovga tayanib. Nashrning yozishicha, Zelenskiy mamlakatda harbiy holat joriy qilmoqchi.
Yig‘ilish Kiyev vaqti bilan 17:00 (Toshkent vaqti bilan 20:00) da bo‘lib o‘tadi.
“Yig‘ilishda milliy xavfsizlikni ichki va tashqi tahdidlardan ta’minlash chora-tadbirlari, iqtisodiyot, energetika, koronavirus pandemiyasiga qarshi kurashish va shu kabi sohalardagi ishlarning bugungi holati ko‘rib chiqiladi”, — deyiladi xabarda.
Uchrashuv taxminan bir yarim soat davom etishi kutilmoqda, undan so‘ng Milliy xavfsizlik kengashi kotibi Aleksey Danilov brifing o‘tkazadi.
24-fevral kuni ertalab Zelenskiy Ukraina tashqi razvedka xizmati uchun “milliy manfaatlarni himoya qilish yo‘lida agressiv harakatlarga o‘tish” vaqti kelganini aytdi. “Bugun davlatimiz o‘ta xavfli tahdidlarga, xususan, suverenitet, hududiy yaxlitlik va birlikka tahdid solayotgan tahdidlar qarshisida turibdi”, — dedi u.
24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun maxsus harbiy operatsiya boshlanganini ma’lum qildi. Rossiyaliklarga murojaatida u Kreml Ukrainani demilitarizatsiya va denazolifikatsiya qilishga intilishi, biroq Ukraina hududlarini bosib olish rejada yo‘qligini aytdi.
Putinning murojaatidan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.
Izoh (0)