Samarqand viloyati Samarqand shahrida ona farzandi bilan tovlamachilik qilayotgan vaqtida qo‘lga olindi, deb xabar bermoqda Tergov departamenti.
Qayd etilishicha, fevral oyi o‘rtalarida A.D. (43 yoshli) o‘zganing mulkini tovlamachilik yo‘li bilan qo‘lga kiritish maqsadida o‘zining qizi A.S. (16 yoshli) bilan o‘zaro jinoiy til biriktirgan. B.G. (29 yoshli) bilan uchrashib, ularda B.G.ga tegishli videotasvirlar mavjud ekanini aytib, videoyozuvlarni ijtimoiy tarmoqlarga joylashtirib, sharmanda qilish bilan qo‘rqitgan. Ular ushbu ma’lumotlarni oshkor qilmaslik evaziga 2 ming dollar pul talab qilgan.
21-fevral kuni soat 18:30 larda Samarqand shahri IIB xodimlari tomonidan o‘tkazilgan tezkor tadbir davomida A.S. kelishilgan pulning 650 dollarini olayotgan vaqtida qo‘lga olingan. Undan pullar xolislar ishtirokida ashyoviy dalil sifatida rasmiylashtirib olingan.
Holat yuzasidan A.D. hamda A.S.ga nisbatan Jinoyat kodeksining 165-moddasi 2-qismi “v” bandi (bir guruh shaxslar tomonidan oldindan til biriktirib sodir etilgan tovlamachilik) bilan jinoyat ishi qo‘zg‘atilgan.
Izoh (0)