Shavkat Mirziyoyev ayni vaqtda Beruniy tumani faollari bilan uchrashmoqda. “Daryo” muxbirining xabar berishicha, prezident o‘z nutqida Taxiatosh elektrostansiyasi haqida gapirib, uning 65 yil avval qurilganini hamda bugungi kun talablariga javob bera olmasligini ta’kidladi.
“Shuning uchun ham hozirda borlarining quvvatini oshirib borish bilan birga, yangi va innovatsion quvvatini ham yo‘lga qo‘yamiz. Bizga keladigan investorlar eng avvalo “gazing, suving bormi, aeroportlaring ishlayaptimi?”, deb so‘raydi. Biz esa bunga munosib javob berishimiz kerak. Navoiyda quyosh elektr stansiyasini qurdik, endi navbat shamol energiyasiga. Agar bu loyiha to‘liq ishga tushsa, 110 ming aholi elektr energiyasi bilan ta’minlanadi”, — deydi Shavkat Mirziyoyev.
“Hozir barcha rahbarlar Qoraqalpog‘istonda. Hech qaysi tuman e’tibordan chetda qolmaydi. Asosiy maqsadimiz Qoraqalpog’iston iqtisodiyotini va salohiyatini ikki barobar oshirish. Qorao‘zakda kon-metallurgiya barpo etish bo‘yicha investorlar bilan muzokaralar olib boryapmiz, bu loyihani ham boshlaymiz”, — deya qo‘shimcha qildi davlat rahbari.
Shuningdek, yig‘ilish davomida so‘zga chiqqan Yevropa taraqqiyot va tiklanish banki, shuningdek, ACWA Power kompaniyasi vakili O‘zbekiston bilan hamkorlikdan mamnun ekanini bildirdi.
Bundan avval Shavkat Mirziyoyev Qoraqalpog‘iston Respublikasining Beruniy tumanida shamol elektr stansiyasi (quvvati 100 MVt bo‘lgan) qurilishini boshlash uchun tamal toshini qo‘ygani haqida xabar berilgan edi.
Eslatib o‘tamiz, davlat rahbari hududlar rivoji va aholi hayoti bilan tanishish maqsadida 23-fevraldan buyon Qoraqalpog‘istonda bo‘lib turibdi. Tashrif uch kun davom etishi rejalashtirilgan.
Izoh (0)