Namanganda ota-onasi yoki boquvchisini yo‘qotgan, nogironligi bo‘lgan xotin-qizlarning 100 nafariga bir yillik kontrakt-to‘lov pullari to‘lab berildi. Bu haqda “Daryo” muxbiri Azizbek Abduvaliyev xabar bermoqda.
Mazkur to‘lovlarning umumiy summasi 742 million so‘m bo‘lib, shartnomalar eng kami 5,7 million so‘mdan to 13,3 million so‘mgacha.
“Mazkur mablag‘lar mamlakatimizdagi 27 ta oliy ta’lim muassasasiga o‘tkazib berildi. Xotin-qizlarimiz orasida esa nafaqat yoshlar, balki katta avlod vakillari ham bor. Jumladan, ulardan biri 43 yoshni qoralaganiga qaramay o‘qish va oliy ma’lumotli bo‘lish istagini bildirdi. Biz bu borada singlimizga bajonidil yordam berdik”, — deydi viloyat hokimining xotin-qizlar masalalari bo‘yicha maslahatchisi Iroda Qo‘chqorova.
To‘raqo‘rg‘onlik Xurshida Turdiyeva 36 yoshda. Bundan 7 yil avval turmush o‘rtog‘i olamdan o‘tgan, hozirda ikki nafar farzandni yolg‘iz o‘zi tarbiyalamoqda.
“Ziyoli oilada o‘sib-ulg‘ayganman, maktabda yaxshi baholarga o‘qiganman. Biroq erta turmushga chiqib, keyin birin-ketin farzandlar tug‘ilib, oliy ma’lumot ololmagandim. Rahmatli turmush o‘rtog‘im doim ‘baribir o‘qib olishingiz kerak‘ der edi. U kishining aytganlarini amalga oshirish uchun ham o‘tgan yil Namangan muhandislik-texnologiya institutiga hujjat topshirdim va kontrakt asosida o‘qishga qabul qilindim. Yolg‘iz ayol boshim bilan buni uddalay olarmikinman, mablag‘ni qayerdan topaman deb ikkilanib turgandim. Mahalla va oilani qo‘llab-quvvatlash boshqarmasi mutasaddilari jonimga oro kirdi: qariyb 7 million so‘m shartnoma pulini o‘tkazib berishdi. Buning uchun oilamiz nomidan minnatdorlik bildiraman”, — deydi Xurshida Turdiyeva.
Izoh (0)