Namanganda uy vazifasini qilmagani uchun izza qilingan 1-sinf o‘quvchilarining ota-onalari sinf rahbari ishdan olinishiga qarshi chiqdi

Namangan viloyati Uchqo‘rg‘on tumanidagi 13-maktabda dars tayyorlamagan 1-sinf o‘quvchilari doskaga chiqarilib, o‘qituvchi tomonidan izza qilingani, oqibatda u ishdan olingani xabar qilingandi. “Yoshlar” telekanalining “Yangi davr” informatsion dasturida ma’lum qilinishicha, o‘quvchilarning ota-onalari sinf rahbarining ishdan ketmasligini so‘radi.

Qayd etilishicha, ota-onalar o‘qituvchining ishdan olinmasligi, faoliyatini davom ettirishini so‘rab, bir qator ijobiy fazilatalarini sanab o‘tgan.

“Karantin payti o‘zi uyma-uy yurib o‘quvchilarni o‘qitib kelgan payti ham bo‘lgan u ayolning. Bolalarning bilimi pasayib ketmasligi uchun”, — degan o‘quvchilardan birining otasi.

Ota-onalar o‘qituvchi farzandlarini yaxshi o‘qitayotganini, bundan buyog‘iga ham o‘zi o‘qitishini, aybi yo‘qligini aytib, ularni hech kim chaqirmaganini, o‘z xohishi bilan yig‘ilganini bildirgan.

“Bolalarimiz endi shu ayolga o‘rgandi, boshqasiga o‘rganguncha qiynaladi”, — deydi onalardan biri.

“O‘quvchilarimning ota-onalari bilan shaxsiy guruh ochvolgandik. Bolalarning kamchiligi, darslarni bajarmayotgani haqida ular bilan muhokama qilib turardik. Videoni o‘zim olib, ota-onalarga yuborganman. Bunda mana shu o‘quvchilar xulosa chiqarib olsin, degan maqsad bor edi, yomon niyatda qilinmagan. Bu ishimdan pushaymonman, bu holat boshqa qaytarilmaydi”, — deya qayd etgan o‘qituvchi Sh.M.

Holat yuzasidan sinf rahbari Sh.M. bilan tuzilgan mehnat shartnomasi bekor qilingan. Mehnat kodeksining 181-moddasi (intizomiy jazolar) 1-bandiga ko‘ra, o‘z vazifasiga sovuqqonlik bilan qaragani uchun ta’lim muassasasi direktori O.M., ma’naviy-ma’rifiy ishlar bo‘yicha direktor o‘rinbosari Y.A.ga hayfsan intizomiy jazo chorasi qo‘llangan, o‘quv ishlari bo‘yicha direktor o‘rinbosari M.I. jiddiy ogohlantirilgan.

Eslatib o‘tamiz, 8-fevral kuni Andijon viloyati Marhamat tumanida o‘qituvchilar maktablarda o‘quvchilarning o‘zlashtirishi qoniqarsiz ekani tufayli ota-onalardan uzr so‘ragani aytilgan xabar e’lon qilindi. Holat keng jamoatchilik vakillari orasida muhokamaga sabab bo‘ldi. Xususan, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov “Shuhrat Abdurahmonovning shaxsan o‘zi barcha ustozlardan uzr so‘rashi kerak”ligini yozdi.