O‘zbekistonda yo‘lovchilarning 72 foizi Damas transport vositasidan foydalanmoqda. Bu haqda 18-fevral kuni bo‘lib o‘tgan Parlament komissiyasining navbatdagi majlisida Oliy Majlis Senati raisi Tanzila Norboyeva aytib o‘tdi, deya xabar bermoqda “Daryo” muxbiri.
Senat raisining aytishicha, mamlakatda aholiga qulay transport xizmatini ko‘rsatish va ularni xavfsiz jamoat transporti bilan ta’minlash borasida muammolar ko‘p.
“Respublika bo‘yicha har ming nafar aholi uchun o‘rtacha 0,5 ta avtobus to‘g‘ri keladi. Hududlardagi yo‘nalishli taksilar, ya’ni Damas avtomobillarini tartibga solish zarur. Bugungi kunda yo‘lovchilarning 72 foizi aynan ushbu transport vositasidan foydalanishga majbur”, — dedi Senat raisi.
Ta’kidlanishicha, yo‘l-transport hodisalarining katta qismi Damas’lar ishtirokida sodir bo‘lmoqda.
“Masalan, 2021-yilda ro‘y bergan yo‘l-transport hodisasining 21 foizidan ortig‘i ushbu transport turi ishtirokida ro‘y bergan”, — deydi Tanzila Norboyeva.
Avvalroq prezident Shavkat Mirziyoyev 11-fevral kuni o‘tkazilgan videoselektor yig‘ilishida O‘zbekistonda yo‘l harakati xavfsizligi masalasi izdan chiqib ketganini ta‘kidlagan edi. O‘zbekistonda haydovchilikka o‘qitish va guvohnoma berish bo‘yicha yangi tizim yaratilishi, qoidabuzar haydovchilar uchun jarima ballari tizimi joriy etilishi haqida xabar berilgandi.
Ma’lumot uchun, O‘zbekistonda 2021-yilda yo‘l-transport hodisalari oqibatida jami 2426 kishi halok bo‘ldigan. 2021-yilning yanvar—dekabr oylarida jami 10 001 ta yo‘l-transport hodisalar sodir etilgan bo‘lib, ular oqibatida 9230 kishi jarohat olgan.
YTHlarning 4698 tasi piyodalar, 1621 tasi bolalar, 1075 tasi velosipedchilar, 84 tasi mototsiklchilar bilan sodir bo‘lgan. Avariyalar sodir etgan haydovchilarning 268 nafari ayollar bo‘lsa, 9733 nafari — erkaklar.
Izoh (0)