“To‘qqiz nafar IIB xodimi nopok harakati uchun ishdan olingan” — Buxoro viloyat IIB boshlig‘i

Buxoro viloyati IIB tizimida faoliyat yurituvchi to‘qqiz nafar xodim IIB xodimlariga xos bo‘lmagan nopok xatti-harakatlari uchun ishdan bo‘shatilgan. Bu haqda viloyat IIB boshlig‘i Shuhrat Aliyev ishtirokidagi matbuot anjumanida ma’lumot berildi, deya xabar qildi “Daryo” muxbiri.

“Bo‘shatilganlar orasida ichki ishlar organlari nomiga dog‘ tushirib, pora olish jinoyatini sodir etganlar ham yo‘q emas. Kechagina besh nafar xodimni noloyiq xatti-harakati uchun, ikki nafar xodimni esa nopok harakati uchun ishdan oldik. Yana ikki nafar xodimga nisbatan xizmat tekshiruvi tayinlanib, aybi isbotlangach ishdan ketdi. 2022-yilning juda qisqa davrida to‘qqiz nafar xodim IIB xodimiga xos bo‘lmagan nopok harakatlari uchun ishdan olindi. 11 ta holatda esa ma’muriy huquqbuzarlikka yo‘l qo‘yilgani aniqlandi”, — dedi Shuhrat Aliyev.

Boshqarma boshlig‘ining ma’lumot berishicha, 2021-yil davomida ichki ishlar organlarida faoliyat yuritib kelgan 55 nafar xodim ishdan bo‘shatilgan. Shundan 44 nafari o‘z xohishi va boshqa lavozimlarga ishga o‘tib ketgani munosabati bilan vazifasidan ozod etilgan bo‘lsa, 11 nafari esa salbiy sabablar bilan bo‘shatilgan. Shuningdek, 1190 ta holatda IIB xodimlari xizmat intizomini buzgani ma’lum bo‘lgan.

“Viloyatdagi mavjud 544 ta mahalla fuqarolar yig‘inining huquq-tartibot maskanlariga kompyuter jamlanmalari berilgan. Har birida optik shisha tolali kabellar o‘rnatilgan. Bu orqali jinoyat ishlari bo‘yicha shahar-tuman sudlari bilan test rejimida onlayn sud muhokamalarini o‘tkaza olishadi. 570 nafar inspektorga ‘E-ma’muriy ish’ hamda IMB Uzbekistan elektron dasturlari yuklangan planshetlar tarqatilgan. Ulardan talabimiz faqat bitta — halol va vijdonan xizmat ko‘rsatishi shart. Ichki ishlar organlari faoliyatida tartib-intizom talabi har doimgidan yuqori. Talabni bajara olmagan, tizim yuziga dog‘ bo‘lgan xodimlar uchun sohada o‘rin yo‘q”, — dedi Shuhrat Aliyev.