“Damas vaqtinchalik texnik ko‘rikda bo‘lgan”. SSV Surxondaryoda tez yordam xodimi bemorga piyoda xizmat ko‘rsatgani haqidagi xabarga izoh berdi

Ijtimoiy tarmoqlarda Uzun tuman tez tibbiy yordam bo‘limi “Chaqar” mahallasi shoxobchasi feldsheri chaqiruv manziliga yayov borib, bemorga tibbiy xizmat ko‘rsatgani haqida xabar berilgandi. Sog‘liqni saqlash vazirligi ushbu holat yuzasidan izoh berdi.

Vazirlik ma’lum qilishicha, bugungi kunda Uzun tumanida 180 ming nafarga yaqin aholi istiqomat qilib, ularga tuman 103 xizmatining 13 ta sanitar avtomashinasi tibbiy xizmat ko‘rsatadi. Shulardan 9 tasi vrachlik, 4 tasi feldsherlik brigadasidan iborat.

Aniqlanishicha, 2022-yil 13-fevral soat 20:06 da tuman tez tibbiy yordam bo‘limi “Chaqar” mahallasi shoxobchasiga shu hududda yashovchi 76 yoshli fuqaro Q.M. tomonidan chaqiruv kelib tushadi.

“O‘sha vaqtda 103 xizmatiga biriktirilgan Damas avtomashinasi vaqtinchalik texnik ko‘rikka yuborilgani sababli shoxobchadan bor-yo‘g‘i 70 metr uzoqlikda yashovchi ushbu fuqaro xonadoniga navbatchi feldsher B. Ibragimov sanoqli daqiqalar ichida yayov yetib borib, bemorga birinchi tibbiy yordam ko‘rsatgan.

Shuningdek, texnik nosoz bo‘lgan avtomashina o‘rniga qisqa vaqt ichida texnik soz holatdagi boshqa Damas tez tibbiy yordam avtoulovi ‘Chaqar’ mahallasi shoxobchasiga biriktirib berilgan.

O‘z vaqtida ko‘rilgan zarur chora-tadbirlar sababli fuqarolardan tez yordam xizmati faoliyati bo‘yicha hech qanday shikoyatlar kelib tushmagan. Aksincha, fuqaro Q.M. ko‘rsatilgan sifatli tez tibbiy yordam uchun 103 xizmatiga o‘z minnatdorligini bildirgan”, – deyiladi.