“Choliqushi” — o‘zbek tomoshabinlari tomonidan sevib ko‘rilgan ilk turk seriali. Bir-biriga oshiq Feride va Kamronning og‘ir taqdiriga achinib, millionlab muxlislar ko‘ziga yosh kelgan. Xo‘sh, tomoshabinlarni ekranga mixlab qo‘ygan go‘zal juftlikning hayoti aslida qanday kechdi? Ular hozir nimalar bilan band, degan savollarga quyida javob topishingiz mumkin.
Bosh rollarni ijro etgan Feride va Kamron butun dunyo bo‘ylab mashhurlikka erishdi. “Choliqushi” seriali turk adabiyoti klassikasi Rashod Nuri Guntekin qalamiga mansub roman ning ikkinchi ekranlashtirilgan nusxasi edi. Birinchi film 1966-yilda namoyish etilgan, ammo 1986-yilgi mini-serial butun dunyoda shuhrat qozongan. U dunyoning yuzdan ortiq mamlakatlariga sotilgan va Turkiyada hanuzgacha mashhur. U hozir ham ekranlarda tez-tez namoyish etiladi va 2013-yilda mashhur filmning remeyki ham suratga olindi. Yangi “Choliqushi” o‘zidan oldingi serialning shon-shuhratiga soya solmadi. 1986-yilgi mini-serialning asosiy mavzusi islom jamiyatidagi ayol hayoti, asr boshida buzila boshlagan an’analar, erkak va ayol munosabatlarida yangi tendensiyalarning paydo bo‘lishi haqida edi. Qoloq qarashlarga qarshi isyon ko‘targan bosh qahramon ko‘p sinovlardan o‘tishi kerak, lekin u o‘zining sevgisi va mustaqil hayot huquqini himoya qilishga muvaffaq bo‘ladi. Turk ayollari bu serialni katta ishtiyoq va minnatdorchilik bilan qabul qilgan.
1986-yilda suratga olingan “Choliqushi” serialida suratga tushgan aktyorlar tomoshabinlar mehrini qozondi, shuningdek, ularning taqdiri qanday kechgani va hozir nima bilan bandligi barchaga qiziq.
Aydan Shener – Feride paranji kiyishni xohlamagan
Aydan Shener 23 yoshida ushbu serialda bosh rol — qaysar Ferideni o‘ynadi. 18 yoshida “Choliqushi” teleserialining bo‘lajak yulduzi “Turkiya go‘zali” tanlovida g‘olib bo‘lgan, dunyo miqyosida go‘zallik tanlovida o‘z vatanini himoya qilgan. Shundan so‘ng unga reklama roliklari va teleko‘rsatuvlar uchun takliflar tushgani ajablanarli emas. Ammo unga haqiqiy shon-shuhratni “Choliqushi” seriali olib keldi. Serial islomiy jamiyatda yashashga majbur bo‘lgan va hech qanday huquqqa ega bo‘lmagan qizning og‘ir yo‘li haqida hikoya qiladi. Bu mavzu turk ayollariga tanish edi, shuning uchun “Choliqushi” seriali darhol mashhurlikka erishdi. Aydanning so‘zlariga ko‘ra, xurofot bilan kurashadigan qahramoni unga ruhiy jihatdan juda yaqin edi: “Men musulmonman, men Xudoga ishonaman, Alloh bilan aloqam borligini his qilaman... Lekin ro‘mol o‘rashda, hatto paranji kiyishda biror ma’no ko‘rmayapman. Alloh menga go‘zallik bergan bo‘lsa, nega uni yashirishim kerak?.. Men tenglik tarafdoriman”.
Biroq aktrisaning sevimli turmush o‘rtog‘i, qizinig otasi uning tug‘ilgan kuniga paranji sovg‘a qilgan.
Aktrisa turmush o‘rtog‘i bilan 8 yil yashadi va bu yillar davomida uning eri go‘zal rafiqasini qattiq rashk qilib, undan aktrisalik karyerasini to‘xtatishini va uyda qolishini talab qildi. Aftidan, paranja so‘nggi nuqta edi: ular ajrashishdi va Aydan boshqa turmushga chiqmadi, garchi uning so‘zlariga ko‘ra, yangi turmush borasida ko‘plab takliflar bo‘lgan bo‘lsa ham. U “Choliqushi”dan keyin ko‘p rollar o‘ynadi, ammo u qadar muvaffaqiyatga erishmadi. XXI asrning boshlarida u ekranlardan g‘oyib bo‘ldi. Aktrisa tomoshabinlarga qari ko‘rinishni istamagani haqida mish-mishlar ham paydo bo‘ldi, lekin aslida Aydanning ko‘rinishi hozir ham ajoyib, u xuddi yoshlikdagidek go‘zalligicha qolgan. Uning asosiy faoliyati inson huquqlarini himoya qilish va uysiz hayvonlarga yordam berishdir. U vaqti-vaqti bilan teleko‘rsatuvlarda ko‘rinish berib turadi.
Kenan Kalav — Kamron qamoqdan chiqqanidan keyin ham suratga tushdi
Kenan Kalav 25 yoshida Feridening sevgilisi rolini o‘ynagan. U “Choliqushi” serialida suratga tushgandan so‘ng yangi takliflarga umid qilgandi, biroq natija kutilganidek bo‘lmadi. Keyinchalik ma’lum bo‘lishicha, 1990-yilda Kenan Ispaniya chegaralarida hibsga olingan. U giyohvand moddalar kontrabandasi bilan shug‘ullangan va Ispaniyada bu jinoyat juda qattiq jazolangan. Sud hukmiga ko‘ra, aktyorga 10 yillik qamoq jazosi berilgan. To‘g‘ri, u 6 yildan so‘ng ozod qilindi, qarindoshlari va do‘stlari uni qo‘llab-quvvatladi. Kenan qamoqxonada o‘zini yaxshi tutgani uchun muddatidan avval chiqib ketishga muvaffaq bo‘ldi. Bunday sarguzashtlardan keyin u boshqa noqonuniy ish haqida o‘ylamagani aniq. Aktyor Ispaniyada, Barselonada yashab, restoran biznesi bilan shug‘ullana boshladi. Ammo u vatanini ham unutmadi: uzoq yillik ta’tildan so‘ng, 1999-yilda Turkiyaga qaytdi. Va o‘z kasbini davom ettirishga muvaffaq bo‘ldi. Kenan bir nechta teleseriallarda rol ham o‘ynadi, turmush qurdi, o‘g‘il ko‘rdi. Hozir aktyor ikki davlatda istiqomat qilib, Ispaniyadagi restoranlarini boshqarishda davom etmoqda va umuman u taqdiri shunday kechganidan mamnun.
Mine Chayro‘g‘lu — Munisa qo‘shiqchi va aktrisa
Tomoshabinlar Mine Chayro‘g‘lini ham yaxshi eslaydi: aktrisa bosh qahramon Feride tomonidan asrab olingan qishloq qizi Munisa rolini ijro etgan. 1986-yilgi serialda Mine 9 yoshli qizaloq rolini o‘ynagan va bu uning birinchi ijrosi emasdi. So‘nggi 30 yil ichida Mine juda ko‘p yutuqlarga erishdi: 43 yoshli go‘zal va iste’dodli aktrisa yigirmaga yaqin film va teleko‘rsatuvlarda rol o‘ynagan va u kuylash borasida ham muvaffaqiyatga erishgan.
Sadri Alishik – Xayrullobey
Aktyor Sadri Alishik teleserialida 60 yoshida ishtirok etgan va uning filmografiyasida 140 tadan ko‘proq rol mavjud. U 1946-yilda, 25 yoshida aktyorlik faoliyatini boshlagan va haqiqiy kelishgan odam, aristokratik xususiyatlarga ega qoramag‘iz aktyor edi. Sadri Alishik Turkiyada mashhurlikka erishdi: u ham dramatik, ham komediya rollarini bir xil darajada yaxshi ijro etgan. Ayniqsa, “Choliqushi” filmida o‘z iste’dodini ajoyib tarzda namoyon qilgan. 80-yillarda u oldingiga qaraganda kamroq suratga tusha boshlagan edi. 1995-yilda taniqli aktyor vafot etdi. Sadri Alishik o‘limidan bir yil avval so‘nggi rolini ijro etgandi. U nafaqat “Choliqushi” seriali va boshqa ko‘plab kinoasarlarning sevimli ijodkori, balki shoir sifatida ham yodda qoldi: uning muallifligida she’rlari chop etildi. Aktyor sharafiga Turkiyada madaniyat markazi va teatrlardan biriga nom berilgan.
Mazmunli serial qahramonlarini sevib qolgan tomoshabinlar endi nafaqat eski epizodlarni qayta tomosha qilishlari, balki 2013-yilda xuddi shu nom ostida suratga olingan “Choliqushi” yangi loyihasi bilan solishtirishlari mumkin.
Izoh (0)