O‘zbekistonda endi nogironligi bor shaxslarga bir xil miqdorda — 622 ming so‘m nafaqa tayinlanadi

Shavkat Mirziyoyev nogironligi bo‘lgan shaxslarni ijtimoiy qo‘llab-quvvatlash choralarini yanada kuchaytirishga qaratilgan farmonni imzoladi. Bu haqda Moliya vazirligi xabar qildi.

Farmonga asosan nogironligi bo‘lgan shaxslar, ayniqsa, doimiy parvarishga muhtoj bo‘lgan bolalarni parvarishlayotgan oilalarni davlat tomonidan ijtimoiy qo‘llab-quvvatlash tizimida yangi yondashuv joriy etilgan. Xususan, 2022-yilning aprel oyidan boshlab nogironligi bo‘lgan shaxslarga tayinlanadigan nafaqalar miqdori bir xil bo‘ladi. Yangi doimiy parvarishga muhtoj nogironligi bo‘lgan bolalarni parvarish qiluvchi shaxslarga yangi nafaqa joriy etiladi.

Qayd etilishicha, avvalgi tartibda bolalikdan nogiron bo‘lgan shaxslarga 622 ming so‘m, hayoti davomida nogiron bo‘lib qolgan shaxslarga 440 ming so‘m miqdorida nafaqa to‘lab berilgan.

Endilikda nogiron bo‘lib qolishi muddatidan qat’i nazar, nogironligi bo‘lgan shaxslarga bir xil miqdorda — 622 ming so‘mga teng nafaqa tayinlab boriladi. Dastlabki hisob-kitoblarga ko‘ra, 49 ming nafar nogironligi bo‘lgan shaxslar uchun nafaqa 41 foizga oshadi. Mazkur chorani amalga oshirishga 2022-yilga qo‘shimcha 81 milliard so‘m ajratiladi.

Shuningdek, tizimning ijtimoiy adolatliligini saqlab qolish maqsadida nogironligi bo‘lgan shaxslarga beriladigan nafaqa miqdoridan past bo‘lgan nogironlik pensiyalari miqdori 622 ming so‘mgacha yetkaziladi. Nogironlik pensiyasini oluvchi 133 ming shaxslarning pensiya miqdori o‘rtacha 29 foizga oshadi. Mazkur chorani amalga oshirishga 2022-yilda qo‘shimcha 140 milliard so‘m Pensiya jamg‘armasi hisobidan ajratiladi.

Yangi tartibga ko‘ra, doimiy parvarishga muhtoj bo‘lgan 18 yoshgacha nogironligi bo‘lgan bolalarni parvarish qiluvchi ota-onalarga minimal iste’mol xarajatlardan kam bo‘lmagan miqdorda (500 ming so‘m) nogiron bola parvarishi uchun yangi nafaqa joriy etiladi.

Mazkur nafaqa farmon bilan tasdiqlangan o‘zgalar parvarishiga muhtoj bo‘lgan 18 yoshgacha bolalarning kasalliklari ro‘yxatidan kelib chiqib tayinlanadi. Natijada dastlabki hisob-kitoblarga asosan, 30 mingdan oshiq nogironligi bo‘lgan bolalarni parvarish qiluvchi onalar uchun davlat budjetidan 2022-yilda qo‘shimcha 157 milliard so‘m ajratiladi.