2021-yili Namangan viloyatida alimentlar bo‘yicha 2,8 milliard so‘mlik oldindan to‘lovlar amalga oshirildi. Bu haqda MIB viloyat boshqarmasi katta inspektori Azimjon Boydadayev ma’lum qildi, deya xabar beradi “Daryo” muxbiri Azizbek Abduvaliyev.
Ushbu summadan 1,3 milliard so‘mi oldindan to‘lov sifatida berilgan 6 ta uy-joyga to‘g‘ri keladi.
“Aliment to‘lovlari to‘liq va o‘z vaqtida amalga oshirilishini nazorat qilish maqsadida har bir aliment oluvchiga bank hisobvarag‘i ochilib, ularning nomiga bepul rasmiylashtirilgan 21 mingta plastik kartadan 19 mingtasi tarqatildi”, — deydi Azimjon Boydadayev.
Boydadayevga ko‘ra, ushbu sa’y-harakatlar natijasida 2021-yilning dekabr oyi davomida 1,4 milliard so‘m undirilib, aliment oluvchilarning plastik kartalariga to‘g‘ridan-to‘g‘ri yo‘naltirildi.
2022-yil yanvar oyida bu ko‘rsatkich 2,5 milliard, fevral oyining birinchi o‘n kunligida esa 1,7 milliard so‘mni tashkil etgan.
Izoh (0)