Namangan viloyati va Qoraqalpog‘istonda fuqarolarga mashg‘ulotlarda qatnashmasdan, qisqa muddatda haydovchilik guvohnomasini olib berishni va’da qilgan o‘rgatuvchi ustalar qo‘lga olindi. Bu haqda Bosh prokuratura huzuridagi Iqtisodiy jinoyatlarga qarshi departament xabar qildi.
Bosh prokuratura huzuridagi departamentning Yangi Namangan tuman bo‘limi tomonidan o‘tkazilgan tezkor tadbirda, “Vatanparvar” tashkilotining Namangan viloyati texnik va amaliy sport turlari markazi o‘rgatuvchi ustasi X.M. fuqaro A.ga 15 kun muddatda 600 AQSh dollari evaziga “B, C” toifadagi haydovchilik guvohnomasini o‘quv mashg‘ulotlariga qatnashmasdan olib berishni va’da qilib, 300 AQSh dollari va 3 million so‘mni olgan vaqtida ashyoviy dalillar bilan ushlangan.
Shu kabi, departamentning Xo‘jayli tuman bo‘limi tomonidan IIV xodimlari bilan hamkorlikda o‘tkazilgan tezkor tadbirda “Vatanparvar” tashkilotining Xo‘jayli tumani kengashi o‘rgatuvchi ustasi G.U. va fuqaro Y.B. fuqaro S.ga haydovchilik guvohnomasini olib berish evaziga 1,9 million so‘mni olgan vaqtida ashyoviy dalillar bilan ushlangan.
Xuddi shunday, departamentning Nukus shahar bo‘limi tomonidan DXX hamda IIV bilan o‘tkazilgan tezkor tadbirda fuqaro Q.A. fuqaro A.ga go‘yoki Qoraqalpog‘iston Respublikasi YHXBda ishlovchi tanishlari orqali haydovchilik guvohnomasini olib berish evaziga 3 million so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Mavzuga doir:
Izoh (0)