Buxoro viloyati Qorako‘l tumanida 33 yoshli kelinning jasadi mahalla ichidan oqib o‘tuvchi katta kanaldan topilgan. Uning jasadi g‘avvoslar tomonidan olib chiqilgan. Bu haqda “Daryo”ga tumandagi “Chandirobod” mahalla fuqarolar yig‘ini raisi Sadriddin Sharopov ma’lum qildi.
Holatga ko‘ra, tumandagi “Arabxona” mahallasida S.R. (1989-yilda tug‘ilgan) 8-fevral kuni uyidan chiqib ketib, qaytib kelmagan. Uning jasadi 11-fevral kuni mahalla ichidan oqib o‘tuvchi Yomon jar katta kanalidan viloyat Favqulodda vaziyatlar boshqarmasi qutqaruv otryadi g‘avvoslari tomonidan olib chiqilgan.
Sadriddin Sharopovning bildirishicha, S.R. “Chandirobod” mahallasida yashovchi fuqaro O‘.M.ning (1994-yilda tug‘ilgan) xonadoniga qonuniy nikohsiz kelin bo‘lib tushgan.
“O‘.M. birinchi xotinini o‘g‘irlab qochgan, u bilan ham noqonuniy yashagan va juda qisqa vaqt ichida ajralgan. Qiz o‘g‘irlab qochishlarning hali-hanuz davom etayotgani bizning og‘riqli nuqtamiz. S.R. esa O‘.M.ning ikkinchi xotini. O‘tgan yilning kuz faslida qarshiligimizga va ogohlantirishimizga qaramay, O‘.M. mahalla-ko‘ysiz o‘zidan 5 yosh katta bo‘lgan va hali turmushga chiqmagan qizni ikkinchi xotin sifatida uyga olib kelib, u bilan ham qonuniy nikohsiz yashab yurdi. Bilishimizcha, qizning otasi va akasi bu yigit bilan uning turmush qurishiga qarshi bo‘lishgan. Biroq, ular birga yashagan vaqtda er-xotin o‘rtasida kelishmovchilik yoki janjal chiqqani haqida eshitmaganmiz. O‘zaro tinch yashab kelishayotgandi. 8-fevral kuni ayolning yo‘qolgani ma’lum bo‘ldi va ichki ishlar organlari tomonidan qidiruvga berildi. 11-fevral kuni esa ayolning jasadini g‘avvoslar olib chiqdi”, — deydi Sadriddin Sharopov.
Viloyat Favqulodda vaziyatlar boshqarmasi matbuot xizmati rahbari Mirjon Fayzullayevning so‘ziga ko‘ra, 11-fevral kuni soat 06:48 da qutqaruv bo‘limiga chaqiruv bo‘lgan. Yomon jar katta kanalining Buxoro shahridan qariyb 90 kilometr olisdaligi bois, qutqaruv guruhi taxminan soat 09:15 larda yetib borgan. Jasad 15 daqiqada topilgan va unda turli dog‘lar mavjud bo‘lgani bois, jinoyat alomatlari topilishi ehtimolida sud-tibbiy ekspertizaga topshirilgan.
Qorako‘l tuman hokimligi vakili Salomat Komilova marhumaning sog‘lig‘ida nuqsoni borligi va shuning uchun haligacha turmushga chiqmagani haqida eshitganini bildirdi.
“Daryo” muxbiri marhuma bilan noqonuniy yashab kelgan turmush o‘rtog‘i O‘.M. bilan telefon orqali suhbatda bo‘ldi.
“Xotinimning sog‘lig‘ida hech qanday muammo yo‘q edi. Men uni yaxshi ko‘rardim. 7-fevral kuni otasining uyiga olib bordim. Lekin otasi ham, akalari ham salbiy munosabatda bo‘ldi. O‘shanda ayolim uyga qaytayotib: ‘Otamning uyiga boshqa hech qachon qaytmayman. Mening joyim onamning yonida’, — dedi. Ayolimning onasi 5 yil ilgari vafot etgan. Shundan buyon u juda qiynalib kelayotgani haqida ko‘p gapirardi. Yaqin qarindoshlari esa, hatto to‘yimizga ham kelishmagandi. Meni o‘ylantiradigani — xotinimning jasadi yarim yalang‘och topilgan. U cho‘kishidan oldin kiyimlarini yechib qo‘ygan bo‘lgan”, — dedi O‘.M.
S.R.ning o‘z joniga o‘zi qasd qilgani yoki unga suiqasd qilishgani ochiq qolmoqda.
Viloyat prokuraturasi matbuot xizmati rahbari Anvar Esanov holat yuzasidan Qorako‘l tuman prokuraturasi tomonidan tergovga qadar tekshirish ishlari olib borilayotganini bildirdi.
Mavzuga doir:
Izoh (0)