Senegalda yangi qurilayotgan stadionga Sadio Mane nomi beriladi

Senegalda “Liverpul” hujumchisi Sadio Mane sharafiga nomlangan stadion quriladi.

Daily Mail’ning xabariga ko‘ra, futbolchining o‘zi tug‘ilib o‘sgan Sediu shahrida 2023-yilda yangi futbol stadioni qurib bitkaziladi. Shahar meri va mamlakatning Madaniy va ommaviy kommunikatsiyalar vaziri Abdulae Diop stadionni Mane sharafiga nomlashni taklif qilgan.

Sadio Senegal terma jamoasining Afrika Millatlar Kubogida ilk bor chempion bo‘lishiga katta hissa qo‘shdi. Hujumchi musobaqadagi barcha yetti uchrashuvda maydonga tushdi va uchta gol, ikkita golli uzatmani amalga oshirdi. Misrga qarshi bo‘lib o‘tgan finalning 7-daqiqasida penaltidan unumli foydalana olmadi. Ammo penaltilar seriyasida jamoasining g‘alaba qozonishiga yordam berdi.

Futboldagi xizmatlaridan tashqari, Sadioning ta’lim, sog‘liqni saqlash va diniy sohalarda amalga oshirilgan ishlari ham inobatga olingan. Jumladan, Mane maktab, tibbiyot muassasalari qurdirgan va bir qancha masjidlarni ta’mirlagan.