Qashqadaryo viloyati Muborak tumani IIB boshlig‘i X.B. qamoqqa olingan. Bu haqda “Daryo”ga viloyat prokuraturasi axborot xizmati xabar berdi.
“Daryo” muxbiri bilan suhbatlashgan Muborak tumani hokimligi axborot xizmati rahbari Yodgor To‘ymurodov bugun, 12-fevral kuni tuman IIB boshlig‘ini izlab, topolmaganini aytgan. “Daryo” manbasi esa tuman IIB boshlig‘i X.B. kecha, 11-fevral kuni viloyat prokuraturasiga chaqirilib qaytib kelmaganini, u fuqaroga yer olib berishni va’da qilib, 50 ming dollar bilan qo‘lga olingan hokim o‘rinbosari masalasiga aloqasi borligi taxmin qilinayotganini bildirgan.“Men ham tuman IIB mas’ullari bilan gaplashganimda, ular IIB boshlig‘i kecha viloyat prokuraturasiga ketganini, hali ishga kelmaganini aytishgandi”, — deydi “Daryo” muxbiri bilan suhbatlashgan Muborak tumani hokimligi axborot xizmati rahbari Yodgor To‘ymurodov.
Eslatib o‘tamiz, fuqaroga yer olib berishni va’da qilib 50 ming dollar bilan qo‘lga olingan Mirishkor tumani hokimi o‘rinbosari, tuman Mahalla va oilani qo‘llab-quvvatlash bo‘limi boshlig‘i U.Ya. hokimlikka o‘tgunga qadar viloyat IIB boshlig‘i o‘rinbosari sifatida faoliyat yuritgan.
Izoh (0)