Jizzax viloyatida tashish qoidalariga rioya qilinmagan go‘sht mahsulotlari bilan bog‘liq bir qator qoidabuzarlik holatlari aniqlandi. Bu haqda Ichki ishlar vazirligi xabar qildi.
Qayd etilishicha, “Sangzor-15” Yo‘l-patrul xizmati maskanida Zomin yo‘nalishi bo‘yicha harakatlanayotgan Nexia avtomashinasi patrul-post xizmati va jamoat tartibini saqlash boshqarmasi karantin tadbirlarini ta’minlash bo‘linmasi xodimlari tomonidan to‘xtatilgan. Tekshiruv chog‘ida avtomashina yukxonasida 165 kilogramm go‘sht mahsuloti borligi aniqlangan.
Haydovchi ushbu go‘sht mahsulotlariga oid hujjatlarni taqdim eta olmagan. Shu bois mahsulot hujjatlashtirilgan. Ma’lum bo‘lishicha, mahsulotlar Dashtobod shahar markaziy dehqon bozorida sotish uchun olib ketilayotgan bo‘lgan.
Shuningdek, Jizzax shahrining “Olmazor” mahallasida istiqomat qiluvchi fuqaroga tegishli Matiz avtoulovida 184 kilogramm go‘sht mahsuloti veterinariya-sanitariya qoidalariga zid ravishda olib ketilayotgani aniqlangan.
Go‘sht mahsulotlari vaqtincha saqlash uchun muzxonaga joylashtirilgan. Hozirda tergovga qadar tekshiruv olib borilmoqda.
Izoh (0)