Prezident Shavkat Mirziyoyev boshchiligida 11-fevral kuni o‘tkazilgan videoselektor yig‘ilishida viloyat hokimlari va ichki ishlar boshliqlariga 3 oy muddatda hududlarida zamonaviy avtomaktab va imtihon markazlarini tashkil etish topshirildi. Bu haqda davlat rahbarining matbuot kotibi Sherzod Asadov ma’lum qildi.
“Raqamlashtirish – yo‘l harakatini boshqarishning eng to‘g‘ri yechimi. Afsuski, na poytaxtda, na hududlarda raqamlashtirish borasida birorta namuna qilib ko‘rsatadigan joy yo‘q. Borini ham eplab ishlata olmayapti”, — deydi Shavkat Mirziyoyev.
Ta’kidlanishicha, Toshkent shahrining 602 ta chorrahasidan 111 tasidagina raqamli boshqaruv mavjud. Boshqa shaharlarda esa bunday tizim yo‘q.
“Harakat xavfsizligini raqamlashtirish bo‘yicha Toshkent shahri, Toshkent, Andijon, Namangan va Farg‘ona viloyatlarida yuzaga kelgan muammolarni o‘zim qattiq nazoratga olganimdan keyin hokimlar va ichki ishlar boshliqlari harakatni boshladi. Ushbu hududlar ichki ishlar boshliqlari 1-iyulgacha keskin o‘zgarish qilmasa, ularga nisbatan qat’iy chora ko‘raman. Boshqa hokimlar ham xulosa qilib, batafsil hisobot beradi”, — degan prezident.
Shuningdek, ma’lum qilinishicha, endi Toshkent shahrida yo‘l harakatini raqamli boshqarish va xavfsizligini ta’minlash tizimini joriy etish to‘liq shahar hokimiyati tasarrufiga o‘tkaziladi. Yil yakuniga qadar poytaxtning 300 ta chorrahasini, kelgusi yilda esa qolgan 302 tasini raqamli tizimga o‘tkazish vazifasi qo‘yilgan.
Sohani raqamlashtirish bilan bog‘liq barcha masalaga shahar mutasaddilari javob beradi va so‘rov ham ulardan bo‘ladi. Axborot texnologiyalari, Ichki ishlar va Transport vazirliklarida ushbu tizimni takrorlovchi yoki ishiga aralashadigan bo‘linmalar bo‘lishi mumkin emas, deydi davlat rahbari.
“Toshkent, Andijon, Namangan, Farg‘ona viloyatlari hokimlarining yo‘l harakatini raqamli boshqarishni joriy etish bo‘yicha ‘yo‘l xaritalari’ bilan tanishib chiqdim. Ularda belgilangan tadbirlar faqat qoidabuzarlikning nazorati bilan cheklangani meni mutlaqo qoniqtirmaydi”, — deydi prezident.
Bir oy muddatda viloyat markazlarida yo‘l harakatini boshqarish va xavfsizligini ta’minlash bo‘yicha yangi konsepsiyalarini ishlab chiqish topshirigan.
Avvalroq O‘zbekistonda qoidabuzar haydovchilar uchun jarima ballari tizimi joriy etilishi to‘g‘risida xabar berilgandi. Bundan tashqari, avtomobilni tartibsiz boshqarib, boshqa haydovchilarga xalaqit qilganlik uchun alohida yo‘l bezoriligi degan yangi javobgarlik turi kiritiladi.
Izoh (0)