Shavkat Mirziyoyev 11-fevral kuni o‘tkazilgan videoselektor yig‘ilishida yo‘l harakati xavfsizligi inspektorlari faoliyatiga qarshilik ko‘rsatish muammosiga alohida e’tibor qaratdi. Bu haqda Prezident matbuot xizmati xabar berdi.
“Mana ko‘p joylarda, internetda ham chiqib ketyapti, uryapti, so‘kyapti, haqorat qilyapti. Qonun yo‘q. U bechora inspektor nima qilishi kerak? O‘zbekiston sharoitida mashinani ustiga haydagani bo‘yicha ham misollar bor. Birorta odam, birorta deputat menga ‘janob prezident, buni o‘zgartiraylik, bu adolatsizlik bo‘lyapti’, degani yo‘q”, — deya ta’kidlagan davlat rahbari.
Shuningdek, Shavkat Mirziyoyev erkinlikning ham me’yori bo‘lishi kerakligini aytgan. “Erkinlik degani qonunni hurmat qilish degani. Shuning uchun inspektor faoliyatiga qarshilik ko‘rsatish, ularni obro‘sizlantirish holatlari ko‘paymoqda. Qonunlarni ko‘rib chiqishda bu masalaga ham alohida e’tibor qaratish zarur”, — deydi prezident.
Avvalroq Shavkat Mirziyoyev O‘zbekistonda yo‘l harakati xavfsizligi masalasi izdan chiqib ketganini ta’kidlagandi. Davlat rahbarining so‘zlariga ko‘ra, mamlakatda 2021-yilda 10 mingdan ziyod avariyalar sodir etilgan va 9 mingdan ortiq fuqaro jarohat olgan, 2,5 mingga yaqin odam (263 nafar bola) halok bo‘lgan.
Izoh (0)