Sevgi yosh tanlamaydi: O‘zbek shou-biznesidagi yoshi orasida katta farq bo‘lgan mashhur juftliklar (foto)

Oilaning tinch-totuv yashashi er-xotinning yoshiga emas, ko‘proq bir-birini tushunishiga bog‘liq deyishadi. Balki shundaydir, ammo ba’zi hollarda yosh o‘rtasidagi tafovut ham pand berishi mumkin. O‘zbek shou-biznesi vakillari orasida o‘zidan bir necha yosh katta yoki kichik bo‘lgan insonlar bilan oila qurganlar ko‘p. Yoshdagi katta tafovut ularning oila qurishiga to‘sqinlik qilmagan.

Ubaydulla Omon o‘zidan 30 yosh kichik qiz bilan oila qurdi

O‘tgan yili O‘zbekiston xalq artisti, “El-yurt hurmati” ordeni sohibi Ubaydulla Baqoyev (Ubaydulla Omon) 73 yoshida 44 yoshli qizga uylandi. U maktabda ingliz tili o‘qituvchisi bo‘lgan 44 yoshli Nilufar Sherova bilan oila qurgan. Aktyorning ilk ayoli esa 2018-yilda vafot etgandi.

Yulduz Usmonova  va Mansur Agaliyev

O‘zbek primadonnasi Yulduz Usmonova turmush o‘rtog‘i Mansur Agaliyevdan bir necha yosh katta. Ammo xonanda bu haqida aniq ma’lumot berishni istamaydi. U turmush o‘rtog‘i bilan baxtli ekanligi va unga suyanib yashayotganini yashirmaydi. Eslatib o‘tamiz, Yulduz Usmonova dekabr oyida 58 yoshni qarshiladi.

Lutfulla Sa’dullayev o‘zidan 10 yosh kichik muxlisasiga uylangan

Lutfulla Sa’dullayev turmush o‘rtog‘i Gulchehra Sa’dullayevadan roppa-rosa 10 yosh katta. Lutfulla Sa’dullayev teatrda ishlab yurgan kezlarida Gulchehra Sa’dullayeva maktabda tahsil olar va aktyor ishtirokidagi spektakllarni tomosha qilish uchun teatrga tashrif buyurgan. Eslatib o‘tamiz, Lutfulla Sa’dullayev 1940-yil, Gulchehra Sa’dullayeva esa 1950-yil Toshkent shahrida tavallud topgan.

Shukurullo Isroilovning ayoli o‘zidan 10 yosh katta

Qiziqchi Shukurullo Isroilov ayoli Maqsudaxondan 10 yosh kichik. Shukurullo Isroilov 1970-yilda, ayoli esa 1960-yilda tavallud topgan. Juftlikning turmush qurganiga 32 yil bo‘ldi. Uzoq yillardan buyon ilmiy ish bilan shug‘ullanadigan Maqsudaxon Isroilova ayni kunlarda Toshkent davlat stomatologiya institutida talabalarga saboq beradi.

Gulchehra Eshonqulova va Sharof Sharopov

Ayni kunlarda AQShda istiqomat qilayotgan va san’atdagi faoliyatini yakunlagan Gulchehra Sharopova turmush o‘rtog‘i Sharof Sharopovdan 13 yosh katta. Gulchehra 1981-yilda, Sharof esa 1994-yilda tavallud topgan. Albatta, ularning oila qurishi oson kechmagan. Hozirda ikki farzandni tarbiyalayotgan juftlik AQShdagi eng baxtli oilalardan biri.

Halimaxonim turmush o‘rtog‘idan 7 yosh katta

Qiziqchi Halimaxonim  turmush o‘rtog‘i Jaloliddindan 7 yosh katta. Halimaxonimning ta’kidlashicha, uyini ta’mirlatayotganda turmush o‘rtog‘i bir nechta yigitlar bilan ishlashga kelishgan. Jaloliddin Halimaga turmush qurish taklifini bergach, bir necha kundan keyin sovchi jo‘natgan. Hozirgi kunda ularning ikki nafar farzandi bor. Halima turmush o‘rtog‘ini hurmat qilsa-da, oilada yetakchi ekanligini yashirmaydi.

Dildora Niyozova va Latifjon Yunusov

Xonanda Dildora Niyozova ham turmush o‘rtog‘i Latifjon Yunusovdan bir necha yosh katta. Ammo yosh o‘rtasidagi tafovut ularning baxtli yashashiga xalal bermaydi. Ayni damda baxtli oilaning ikki nafar farzandi bor.

Feruza Karimova katta yoshdagi inson bilan oila qurgan

Feruza Karimova turmush o‘rtog‘i va prodyuseri Baxtiyor Fattohovdan 12 yosh kichik. Xonanda prodyuserining oilasini buzmaganligini, ular tanishmasidan ancha avval oilaga darz ketganligini ta’kidlagandi.

“2014-yil turmush o‘rtog‘im bilan ko‘rishib qolib, 2015-yil ijod boshlandi. 2016-yil ‘Dastingdan’ qo‘shig‘im chiqdi. Keyin ularda menga nisbatan iliqlik paydo bo‘lgan. Lekin men e’tibor bermaganman. Prodyusermi prodyuser, ishmi ish, bo‘lgan u paytda. Ular o‘sha paytda birinchi oilasidan ajrashgan bo‘lgan. Ish paytida biz bilan ko‘rishib turardilar, suhbatlashardilar. Qarasam, yaxshi inson, mehribon, menga e’tiborli. Hayoti haqida ham gapirib berardilar. Meni sekin-sekin ko‘niktirib, o‘ziga o‘rgatib, top etib, uzuk olib kelib, qarab turibdilar: ‘Menga turmushga chiqasizmi?’ deb. Bir yil ishladim, xarakterlarini ko‘rdim, mendayam ularga nisbatan mehr paydo bo‘ldi. Turmush o‘rtog‘imni yaxshi ko‘raman, hurmat qilaman. Har doim har taraflama qo‘llab-quvvatlab kelganlar”, — deydi Feruza Karimova turmush o‘rtog‘i bilan qanday tanishgani haqida gapirar ekan.

Baxtiyor Fattohov nafaqat ayolining ijodiga, balki bir nechta seriallarga ham prodyuserlik qiladi. Hozirda baxtli juftlikning ikki nafar farzandi bor.

Zarina Nizomiddinova o‘zidan 12 yosh katta inson bilan oila qurgan

Ikkinchi farzandini Moskva shahrida dunyoga keltirgan aktrisa Zarina Nizomiddinova turmush o‘rtog‘i bilan orasidagi farq 12 yosh ekanligini yashirmaydi. Aktrisaning turmush o‘rtog‘i 45 yoshda, Zarina esa 33 yoshda. Hozirda ular ikki o‘g‘il farzandlarining tarbiyasi bilan band.

Mirolim Qilichev 34 yoshda 19 yoshli qizga uylandi

O‘tgan yili aktyor Mirolim Qilichev o‘zidan 15 yosh kichik qiz bilan oila qurdi.

— Hozircha yoshimiz o‘rtasidagi farq sezilayotgani yo‘q. Ayolim aqlli va sabrli inson. Er-xotin o‘rtasidagi yosh u qadar ahamiyatli emas, muhimi inson bir-birini tushunishi va qo‘llab-quvvatlashi kerak. To‘yimiz arafasida u meni qo‘lladi. Men haqimdagi yolg‘on mish-mishlarga ishonmay, hayotini menga bag‘ishlagani uchun ham uni hurmat qilaman, —  deydi aktyor Mirolim Qilichev.

Asal Shodiyeva va Shohruhxon yoshidagi tafovut 

Aktrisa Asal Shodiyeva turmush o‘rtog‘i Shohruhxondan 7 yosh kichik. Asal Shodiyeva 1992-yilda, Shohruhxon esa 1985-yilda tavallud topgan. Ularning nikoh to‘yi 2016-yilning 30-may kuni bo‘lib o‘tgan. Ayni kunlarda Asal Shodiyeva va Shohruhxonning ikki nafar o‘g‘il farzandlari bor.

Imron turmush o‘rtog‘ining ulg‘ayishini kutdi

O‘tgan yili bo‘ydoqlik safini tark etgan xonanda Imron ham ayolidan 12 yosh katta. U “Daryo”ga bergan intervyusida ayoli bilan qarindosh ekanligi va uni ilk marta bobosining janozasida ko‘rib qolgani haqida so‘zlab bergandi.

—  Ayolim mendan 12 yosh kichkina. Uning san’atga umuman aloqasi yo‘q. Buxoroda universitetda o‘qiydi, birinchi kursni tugatdi. Xudo xohlasa, endi o‘qishini Toshkentga ko‘chirish harakatidamiz.

Ayolimning bobosi olamdan o‘tganida men ham janozaga borganman. Ular bilan qarindoshchiligimiz bor. O‘sha yerda ko‘rib qolganman, bu voqeaga ikki yarim yil bo‘ldi. Onam, ammalarim mana shuncha qiz, birortasini ko‘r, tanla, qachon uylanasan, deb holi-jonimga qo‘yishmagan vaqtlar edi. O‘shanda mana shu qizga uylanaman, deganman, shunda onam jim, u qiz hali yosh, ota-onasi turmushga bermaydi hali, deganlar. Unday bo‘lsa, boshqa kimga uylanasan, deb so‘ramanglar, deganman, — deydi xonanda Imron.