Pittsburgh Inno Koop Technologies’ni 2022-yilda e’tibor berishga arziydigan startap deb baholadi. Loyiha asoschilaridan biri o‘zbekistonlik Kamron Xo‘jayevdir.
Hammasi bir necha yil avval Bredforddagi Pittsburg universitetida (UPB) toshkentlik Kamron Xo‘jayev va chendulik (Xitoy) Jim Duanning uchrashuvidan boshlandi. Ikkala yosh yigit AQShga yuqori sifatli oliy ta’lim muassasasini izlab kelishgan edi.
Ular mening eng yaxshi o‘quvchilarimdan edi. Ularning moliyaga oid ma’lumotlarni tushuna olishi va izoh berishi, biznes boshqaruvidagi qobiliyatlari o‘ta yuqori edi— deydi Jon Krouford, UPB universiteti moliya kafedrasi dotsenti.
Krouford Duanni o‘zining o‘tkir zehni, chuqur va aniq tahlil qila olishi bilan ajralib turishini ta’kidlaydi. Xo‘jayev ham o‘ta ziyrak, olg‘ir, tabiatan yetakchilik qobiliyatiga ega bo‘lgan, kampusning talabalar investitsion klubini ochishga yordam berib, uning prezidentiga aylangan talaba edi.
Xo‘jayev va Duan yana ikkita iqtidorli talaba bilan tanishishgan – Sergey Litvinenko va Zag Gazizovlar (ikkalasi ham rossiyalik). O‘qishni tamomlagach, to‘rtala yigit ham o‘z yo‘llaridan ketishdi, biroq ularning bir-birini to‘ldiruvchi qobiliyatlari, ishbilarmonlik tajribasi va tadbirkor bo‘lish istagi o‘z startapini boshlash haqida o‘ylashga undadi.
Shunday qilib, 2020-yili Koop Technologies paydo bo‘ldi. U sug‘urta sohasida o‘sib borayotgan o‘ziyurar mashinalar sanoatiga xizmat ko‘rsatuvchi Amerika startapidir.
An’anaviy sug‘urta xizmati inson xavf-xatarlarini baholay oladi, ammo o‘ziyurar avtomobillar inson kabi harakatlanmasligi sababli boshqa xavflar yuzaga kelishi, ularni baholash uchun esa yangi anderrayting modellar kerak bo‘ladi.
Koop Technologies aynan mana shunday modellarni yaratish bilan shug‘ullanadi. Kompaniya platformasi avtonom mashinalarga ma’lumotlar bilan almashishga imkon beradi va ular asosida sug‘urta qoplanmasiga ega bo‘lishga xizmat qiladi.
Bundan tashqari, mazkur startap sug‘urta kompaniyalariga o‘z mahsulotlarini o‘ziyurar avtomobillar mijozlariga moslashtirishda yordam berish uchun ma’lumotlar bilan bo‘lishadi.
Avtonom mashinalar kelajak hodisasiga o‘xshab ko‘rinishi mumkin, ammo ular reallikka yaqinroqdir. Yetkazib beruvchi avtonom robotlar va o‘ziyurar robot taksilar ko‘plab shaharlarda allaqachon mavjud, pandemiya sabab ishchi kuchining yuqori darajada yetishmasligi ushbu hududlarga sarmoya kiritishni tezlashtirdi, – deydi Duan.
Xo‘jayev bu fikrga qo‘shilib, ushbu sohaning kelajagi buyukligini ta’kidlamoqda.
Koop Technologies qisqa vaqt ichida e’tiborga tushdi va 2021-yilning o‘rtalarida Kremniy vodiysining venchur kompaniyalaridan 2,5 mln dollarlik investitsiyalarni jalb qila oldi.
Kompaniya bular bor-yo‘g‘i boshlanishi ekanligi bildirmoqda. Startapning o‘z oldiga qo‘ygan maqsadi haydovchisiz avtomobillarni tijoratlashtirish va uni keng targ‘ib qilishdan iborat.
Xo‘jayev va Duanning ustozi Jon Krouford talabalari fond boshqaruvidagi o‘z karyerasini davom ettiradi deb o‘ylagan bo‘lsa-da, ularning o‘z biznesini boshlashganidan ajablanmadi.
Ularning hamkorlikda ishlashi katta ahamiyatga ega. Kuchli yetakchilik va tahlilchilik qobiliyatlarning birlashuvi g‘alaba kalitidir, — deydi u.
Izoh (0)