Farg‘ona viloyati Qo‘qon shahrida 2022-yil 1-fevral kuni xonadonlarning birida gaz portlashi sodir bo‘lgani va shu atrofdagi 15 ga yaqin xonadonga turli darajada talafot yetgani to‘g‘risida xabar berilgandi. Viloyat FVBning “Daryo”ga ma’lum qilishicha, xonadonda portlash emas, yong‘in sodir bo‘lgan.
Farg‘ona viloyati Favqulodda vaziyatlar boshqarmasining ma’lumotlariga ko‘ra, 1-fevral kuni soat 18:24 da Qo‘qon shahridagi “64-sonli Saodat” MFY, Otabek noib ko‘chasida joylashgan raqamsiz uyda yashovchi M.A.ning xonadonida yong‘in sodir bo‘lgan.
Yong‘in oqibatida xonadonning 60 metr kvadrat maydonda ichki va tom qismi yongan. Hodisa joyiga yong‘in-qutqaruv ekipajlari soat 18:27 da yetib borib, yong‘in soat 18:42 da batamom o‘chirilgan. Yong‘indan uyning 100 metr kvadrat maydoni saqlab qolingan.
Hozirda yong‘inning taxminiy sababi va yetkazilgan zarari aniqlanmoqda. Hodisa oqibatida fuqarolarning tan jarohati olish va halok bo‘lish holatlari qayd etilmagan. Ta’kidlanishicha, yong‘in oqibatida qo‘shni xonadonlarga ziyon yetmagan.
Avvalroq Farg‘onadagi bozorda yong‘in chiqib, 25 ta kiyim-kechak do‘koniga zarar yetgani, Termizdagi xonadonlarning birida yong‘in chiqqani, Samarqandda yong‘in sabab xonadonning 90 kvadrat metr maydoni yonib ketgani to‘g‘risida xabar berilgandi.