O‘zbekiston xalq artisti Farruh Zokirov “Sevimli” telekanalining “Nom” ko‘rsatuviga bergan intervyusida shaxsiy hayoti haqidagi ko‘pchilik bilmaydigan ma’lumotlarni, xususan, ikki marta uylangani, birinchi nikohidan bo‘lgan o‘g‘li bilan oralarida tushunmovchilik bo‘lgani haqida so‘zlab berdi.
“Hammadan keyin uylangan men bo‘ldim. Uyimizda hazillashib Botir akam rahmatli, navbating keldi-ku, qanaqa bo‘lar ekan, kim bo‘lar ekan, balki bir dunyo malikasi bo‘lsa kerak, tanlashing bir boshqacha bo‘lyapti-ku degan. Oyimlar ham, qarindosh tomonidan qarab, falonchi ammangning qiziga e’tibor ber, qandoq yaxshi oila bo‘lar edinglar, degan gaplar ko‘p bo‘ldi. Taqdirni qarangki, aylanib-aylanib, asosiy faoliyatim “Yalla”da bo‘lgan bo‘lsa, ansamblga kelgan Nargiza Boyxonova bilan turmush qurganman”, – deydi xonanda.
Farruh Zokirov “Yalla”ga ayol xonanda qo‘shilishiga boshida qarshi bo‘lganini aytadi:
“Bundan avval qattiq gapirar edim bu to‘g‘risida, erkaklar ansambli, xullas, buning tarafdori emasdim. Sodda qilib gapirganda, ansamblga ayol kelganda, ayniqsa, san’at olamidagi ayol go‘zalligi, chiroyiga, albatta, kimdir e’tibor beradi, kimdir ko‘z tashlaydi. Xo‘sh, endi ayol va erkak bir-biriga mehr qo‘ysa, bu ittifoqlik, to‘g‘ri-mi? Ayniqsa, ijodiy ittifoqlik bo‘ladigan bo‘lsa, jamoani ichida qandaydir qarama-qarshiliklar bo‘ladi. Bu tabiiy narsa. O‘z tajribamda ko‘rdim, boshimdan o‘tdi. Lekin o‘zim shunga duch keldim. Turmushimizdan farzand ko‘rdik, umri uzoq bo‘lsin o‘g‘limning, hozir nabiralarim bor, bu katta baxt. Hamma insonning o‘ziga yarasha fe’l-atvori bor, birinchi turmushimiz bo‘lmadi”.
Ko‘rsatuvda aytilishicha, xonanda o‘g‘li Said tufayli uch nafar nabiraning bobosiga aylangan. O‘z vaqtida esa ota bilan o‘g‘il o‘rtasida chigalliklar ham bo‘lib o‘tgandi.
“Albatta, qandaydir muammolar bo‘lgan. Lekin ayri yashaganimizda ham hech qachon e’tiborsiz qoldirmaganman. Iloji boricha, telefon orqali, qolaversa, uchrashib, onasi bilan qolgan bo‘lsa-da, hech qachon muloqotni, aloqani yo‘qotmaganman. Iloji boricha, yordam va e’tibor qilishga harakat qilar edim, hozirgacha ham. Allohga behisob shukr, mana, katta o‘g‘limdan uchta nabiram bor, hammasi qiz, oliy baxt, juda ham katta baxt”, – deydi Farruh Zokirov.
O‘zbekiston xalq artisti 1986-yilda hayotini boshqa ayol bilan bog‘laydi.
Taqdir taqazosi bilan deyilganidek, yo‘limda bir ayolga duch keldim. Qolaversa, “Xalqlar do‘stligi” saroyida uchrashib qoldik, tasodifan. Xullas, tanishganimizdan keyin qandaydir yaqinlik sezdim. Uchrashib yurganimizda, taqdirga ishonch bergan narsa, u rus, meni sizlab Farruh Karimovich derdi. Bir kuni “Farruh Karimovich, repertuaringizdagi bir qo‘shiq menga shunchalar yoqadiki, shunchalar yaqinki”, – deb qoldi. Men hayron bo‘lib, hozir “Uchquduq” yoki boshqasini aytadi deb o‘yladim. – Bilasizmi? Bu qo‘shiq menga juda yoqadi”, deb “G‘ayra-g‘ayrani” xirgoyi qilib berdi. Stop, ertaga to‘y dedim. Men uchun bu kutilmagan narsa, dilimga to‘ppa-to‘g‘ri keldi-da. Hayotim uchun juda ham muhim narsa bo‘ldi. Shundan keyin onam bilan tanishtirdim. Hech esimdan chiqmaydi, Dilfuza opamning uyida tanishtirganman. Onamlarning birinchi gapi shu bo‘ldi: “O‘g‘lim ko‘zi to‘q ekan”. Oyi, millati rus desam, menga bitta millat qoldi, insof degan millat. Insofli ekan, mayli, qo‘sha qaringlar, deb duo qilganlar. Mana shunga ham 35 yildan oshdi.Farruh Zokirov, O‘zbekiston xalq artisti
Izoh (0)