Ijtimoiy tarmoqlarda o‘qishni xorijdan O‘zbekistonga “perevod” qilish to‘g‘risida tarqalgan xabarlarga munosabat bildirildi

Ijtimoiy tarmoqlarda xorijdan o‘qishni ko‘chirish bo‘yicha oliy va o‘rta maxsus ta’lim vaziri Abduqodir Toshqulov ishtirokida videoselektor yig‘ilish o‘tkazilgani haqida xabarlar tarqaldi. Oliy va o‘rta maxsus ta’lim vazirligi matbuotining ma’lum qilishicha, ushbu xabarlar hech qanday asosga ega emas va yolg‘on.

Ta’kidlanishicha, vazir ishtirokida o‘qishni ko‘chirish mavzusiga oid hech qanday videoselektor yig‘ilishi bo‘lmagan. Xorijdan o‘qishni ko‘chirish amaldagi normativ-huquqiy hujjatlardagi tartibga ko‘ra amalga oshirilmoqda.

“Hurmatli ijtimoiy tarmoq faollari! Har xil soxta axborotlarga ishonib qolmasligingizni yana bir bor so‘rab qolamiz va OTMga o‘qishni ko‘chirishga doir har qanday xabarning haqiqiyligini avval vazirlikning Telegram’dagi @eduuz rasmiy kanali orqali tekshirib ko‘rishingizni tavsiya etamiz”, — deyiladi munosabatda.

Shu bilan birga, vazirlik asossiz va yolg‘on axborotni tarqatganlik uchun qonunchilikka javobgarlik belgilanganini yana bir bor eslatib o‘tgan.

Avvalroq ijtimoiy tarmoqlarda Oliy va o‘rta maxsus ta’lim vazirligi nomidan xorijdan o‘qishini ko‘chirmoqchi bo‘lgan talabalar hech qanday imtihonlarsiz o‘qishini O‘zbekistonga ko‘chirishga ruxsat berilishi va ko‘chirish uchun barcha hujjatlar 15-fevralgacha qabul qilinishi to‘g‘risida xabarlar tarqalgandi. Keyinroq vazirlik buning yolg‘on ekanini to‘g‘risida munosabat bildirgan edi.