Uzbekistan Airways tomonidan Namangan xalqaro aeroportida “Sharqiy xab” loyihasi doirasida Namangan — Perm yo‘nalishi bo‘yicha ilk parvoz amalga oshirildi. Bu haqda “Daryo” muxbiri Azizbek Abduvaliyev xabar bermoqda.
Airbus A320 rusumidagi express havo kemasi “To‘liq ekonom klass” (Full economy) tamoyili asosida 174 nafar yo‘lovchini Rossiyaning Perm xalqaro aeroportiga eltib qo‘ydi.
Namangan xalqaro aeroportida “Sharqiy xab” loyihasining taqdimot marosimi bo‘lib o‘tdi. Unda aviakompaniya vakillari jurnalist va blogerlarni loyihaning ko‘lami, parvozlar xaritasi va reyslar narxi bilan tanishtirdi.
Uzbekistan Airways matbuot kotibi Kamola Ikromovaning ma’lum qilishicha, “Sharqiy xab” tashkil etilishining asosiy maqsadi Farg‘ona vodiysidan talab yuqori bo‘lgan yo‘nalishlar bo‘yicha parvoz qilish uchun qulay va arzon shart-sharoitlar yaratishdan iborat. Aviakompaniya mintaqadan Rossiya va vodiy aholisi orasida talab yuqori bo‘lgan uzoq xorij shaharlariga yo‘nalish tarmog‘ini kengaytirish maqsadida Namangan va Farg‘ona xalqaro aeroportlaridan foydalanadi.
Ma’lumot uchun, Namangandan Full economy tamoyilidagi navbatdagi reyslar Rossiyaning Moskva, Samara, Omsk, Orenburg, Irkutsk, Krasnodar, Yekaterinburg va Ufa shaharlariga rejalashtirilgan.
Izoh (0)