Qoraqalpog‘iston Respublikasi hududidan o‘tgan 4R-180 avtomobil yo‘lida mashinasi buzilib qolgani sababli qolib ketgan yo‘lovchilar qutqarib olindi. Bu haqda Avtomobil yo‘llari qo‘mitasi “Daryo”ga ma’lum qildi.

Foto: Avtomobil yo‘llari qo‘mitasi

Ma’lum qilinishicha, Qoraqalpog‘iston Respublikasi Avtomobil yo‘llari bosh boshqarmasiga bosh boshqarma balansidagi avtomobil yo‘lida fuqarolar qolib ketgani to‘g‘risida xabar kelib tushgan.

Ushbu avtomobil yo‘li respublika ahamiyatidagi 4R-180 Uchquduq sh.—Sarkesh q.—Ashibuzan q.—Chuqurkak ovuli—Baliqboy sh/x—Qorao‘zak—Kegayli avtomobil yo‘li hisoblanib, qisqa vaqt ichida chaqiruv joyiga Favqulodda vaziyatlar boshqarmasi, Ichki ishlar vazirligi, “Hududiy gaz tarmoqlari” va Qoraqalpog‘iston Respublikasi yo‘llardan muntazam foydalanish unitar korxonasi xodimlari yetib borgan.

Aniqlanishicha, yordam so‘rab murojaat qilgan fuqarolar avtomashinalari buzilgani sabab qolib ketgan. Voqea joyidan 31 va 39 yoshli fuqarolar qutqarib olingan. Shuningdek, yo‘lda botib qolgan bir nechta mashinalarga amaliy yordam ko‘rsatilgan.

“Hurmatli fuqarolar, hozirgidek ob-havo sharoitida uzoq yo‘lga chiqmasligingizni so‘raymiz. Agarda uzoq yo‘lga chiqib, qaytib kelmagan yoki bog‘lanish imkoniyati bo‘lmayotgan yaqinlaringiz bo‘lsa, boshqarmaning 1050 yoki 101 raqamlariga qo‘ng‘iroq qiling”, — deyiladi Qoraqalpog‘iston Respublikasi Favqulodda vaziyatlar boshqarmasi xabarida.

Avvalroq Nurafshonda ko‘p qavatli uyning oraliq qismiga tushib ketgan fuqaroning hayoti saqlab qolingani, Nukusda voyaga yetmagan ikki bola muz ostiga tushib ketgani, Surxondaryoda yong‘in bo‘layotgan uydan 5 kishi qutqarib olingani to‘g‘risida xabar berilgandi.