HBO Max va CNN Films kompaniyalarining “Navalniy” nomli hujjatli filmi Amerikaning “Sandens” festivalida ikkita mukofotga loyiq ko‘rildi.

Foto: AP Photo

Rossiyalik muxolif siyosatchi haqidagi kartina tomoshabinlar fikri bo‘yicha eng yaxshi film (Festival Favorite Award) deya e’tirof etilgan. Bundan tashqari, u hujjatli filmlar yo‘nalishi bo‘yicha tomoshabinlar mehrini qozongani uchun alohida mukofotni qo‘lga kiritgan.

“Sandens”da “Navalniy” filmining premyerasi 25-yanvar kuni bo‘lib o‘tdi. Rejissor Deniel Roer tomonidan suratga olingan kartinada siyosatchining “Novichok” bilan zaharlanishi, davolanishi va Rossiyaga qaytishi haqida ma’lumot berilgan.

Filmni namoyish etish huquqi HBO Max’ga tegishli. Rossiyada ushbu striming servis mahsulotlarini tarqatish bilan shug‘ullanuvchi “Amediateka” kompaniyasi filmni namoyish etish huquqini sotib olish bo‘yicha muzokaralar o‘tkazishni rejalashtirmayotganini ma’lum qilgan.

Ma’lumot uchun, “Sandens” (Sundance Film Festival)— Amerika milliy mustaqil filmlar kinofestivali bo‘lib, har yili yanvar oxirida Yuta shtatidagi Park-Sitida o‘tkaziladi. Kinofestival tashkilotchisi 1981-yilda aktyor Robert Redford va uning do‘stlari tomonidan Amerika milliy mustaqil kinosi uchun sharoit yaratish maqsadida asos solingan “Sandens” instituti hisoblanadi. Institut notijoriy tashkilot hisoblanib, butun dunyo bo‘ylab mustaqil kino va badiiy teatrlarni ochish, rivojlantirish va qo‘llab-quvvatlash bilan shug‘ullanadi.