Toshkentda tadbirkorga Oliy sud orqali yordam berishni va’da qilgan shaxslar uni 77 ming dollarga chuv tushirdi

Toshkent shahrida tadbirkorni 77 ming dollarga chuv tushirgan ikki fuqaroga nisbatan jinoyat ishi qo‘zg‘atildi, deb xabar beradi Tergov departamenti.

Ma’lum qilinishicha, 2020-yilning 8-iyul kuni 39 yoshli B.A. va A.U. o‘zganing mulkini firibgarlik yo‘li bilan qo‘lga kiritish maqsadida Yashnobod tumani Boku ko‘chasida joylashgan “Steklovoknistaya plastmasovaya truba” korxonasi rahbari — 55 yoshli U.X.ning ishonchiga kirgan. Ular Farg‘ona viloyati tumanlararo sudining 1,7 milliard so‘m undirish to‘g‘risidagi da’vo arizasini qanoatlantirishni rad etish haqidagi ajrimni Oliy sudda hal qilib berishni va’da qilib, U.X.dan 77 ming dollar miqdoridagi pullarni olib, ularni o‘z ehtiyojiga ishlatib yuborishgani aniqlangan.

Mazkur holat yuzasidan Yashnobod tumani IIO FMB huzuridagi Tergov bo‘limi tomonidan yuqoridagi shaxslarga nisbatan Jinoyat kodeksning 168-moddasi 4-qismi “a” bandi (firibgarlik) bilan jinoyat ishi qo‘zg‘atilgan.

Hozirda ushbu holat yuzasidan tergov harakatlari olib borilmoqda.

Avvalroq Surxondaryoda fuqaroga haydovchilik guvohnomasini imtihonlarsiz olib bermoqchi bo‘lgan inspektor ushlangani, Toshkentda hokimlik zaxirasidagi yerni 420 ming dollarga sotmoqchi bo‘lgan korxona xodimi qo‘lga olingani, Buxoroda pora evaziga 50 gektar yer olib berishni va’da qilgan hokimlik bosh mutaxassisi ushlangani, Farg‘onada prokuror 1000 dollar pora bilan qo‘lga tushgani to‘g‘risida xabar berilgandi.