Toshkent viloyati Ohangaron tumanida yoshi, taxminan, 30-35 larda bo‘lgan ayol kishi murdasi topildi, deya xabar bermoqda viloyat prokuraturasi.

Qayd etilishicha, 27-yanvar kuni soat taxminan 21:30 larda Toshkent viloyatining Ohangaron tumani, “Gulobod” mahallasidan Parkent tumani, Qiziltog‘ qo‘rg‘oniga olib boruvchi yo‘lda qizil rangli chamadon ichidan yoshi taxminan 30-35 larda bo‘lgan,  osiyo millatiga mansub ayol kishi murdasi qotillik alomatlari bilan topilgan.

Viloyat prokuraturasi xabariga ko‘ra, mazkur holat yuzasidan 27-yanvar kuni Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan.

Murdaning shaxsiga aniqlik kiritilgan. Dastlabki tergov harakatlari Toshkent viloyati prokuraturasi tomonidan olib borilmoqda.

Eslatib o‘tamiz, 2020-yil avgustda Qibrayda chamadon ichidan Oliy sud sobiq xodimining jasadi topilgandi. Erkakni o‘ldirganlikda gumonlanib 2 kishi qamoqqa olingandi. Ularning biri RShTYoIM rahbar xodimi ekanligi ma’lum bo‘lgan.