O‘zbekistonda 27-yanvar kuni soat 16:00 holatiga ko‘ra, respublikadagi barcha hududlarda elektr energiyasi ta’minoti to‘liq tiklandi. Bu haqda Energetika vazirligi xabar qildi.
Ma’lum qilinishicha, ayni paytda mamlakatda To‘raqo‘rg‘on issiqlik elektr stansiyasidan tashqari barcha elektr stansiyalarning ish faoliyati tiklangan.
“Shu bilan birga, mamlakatimizda gaz ta’minoti hozircha to‘liq tiklanmaganini inobatga olgan holda, sizdan sabr-toqatli bo‘lishingizni, elektr energiyasi uzilishlarining oldini olish uchun ehtiyojdan tashqari elektr jihozlarini tarmoqqa ulamaslikni so‘raymiz”, — deyiladi xabarda.
O‘zbekistonda kuzatilgan elektr energiyasining yirik nosozligi xronologiyasi
25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Toshkent metropoliteni faoliyati ham to‘xtagan, Respublikadagi barcha poyezdlar o‘z manzillariga kechikib yetib borishi aytilmoqda. Toshkent shahar IIBB esa tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilgandi.Energetika vazirligi ma’lumotlariga ko‘ra, hozirda Toshkent viloyatidagi Chorvoq, Hojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan.
Mavzuga doir: “Toshkentda svet o‘chganiga hayron qoldim”. Poytaxt aholisi va mehmonlari elektr energiyasidagi uzilishlar haqida (video)
Energiya tanqisligi ortidan O‘zbekiston Afg‘onistonga elektr energiyasi yetkazib berishni to‘xtatdi. Gazli, Sho‘rtan hamda Muborak neft va gaz qazib chiqarish boshqarmalaridagi 64 ta kon faoliyatini vaqtincha to‘xtatdi.
SSV Zangiota kovid-markazlaridagi elektr energiyasi bilan bog‘liq holat yuzasidan ma’lumot berdi.
26-yanvar soat 02:30 ga borib O‘zbekistonning 7 ta hududida elektr ta’minoti to‘liq tiklangani xabar qilindi. Biroq shu kuni soat 18:00 ga kelib bunday hududlar soni 4 tagacha qisqardi.
Energetika vazirligi tizimda yuzaga kelgan muammolarni bartaraf etish uchun barcha choralar ko‘rilyayotganini ma’lum qilgandi. Iste’molchilarga tabiiy gaz yetkazib berish bo‘yicha ishlar ham davom ettirilmoqda. 27-yanvardan boshlab O‘zbekistonning ayrim hududlaridagi gaz zapravkalar ishi tiklana boshladi.
Qishloq xo‘jaligi vaziri o‘rinbosari Shuhrat Mirzayevning so‘zlariga ko‘ra, energotizmidagi nosozliklar ortidan qishloq xo‘jaligi mahsulotlarining narxi keskin oshib ketmaydi.
Izoh (0)