Toshkent shahrida joylashgan Milliy gvardiya tarkibidagi “Temurbeklar maktabi” harbiy-akademik litseyiga har yili 100 nafar o‘quvchi saralab olinadi. Bu haqda 25-yanvar kuni harbiy-akademik litseyga uyushtirilgan press-turda ma’lum qilindi, deya xabar bermoqda “Daryo” muxbiri.
Litseyning tarix fani o‘qituvchisi Islom Inoyatovning aytishicha, “Temurbeklar maktabi”ga mart oyidan saralash boshlanadi.
“Litseyimizda o‘qishni istagan 9-sinf bitiruvchilari mart oylarida o‘zlari yashaydigan tumanlardagi mudofaa ishlari bo‘limlariga murojaat qilishlari lozim. Ular maxsus tanlovdan o‘tishlari kerak. Tanlov jarayonlarida avvalo o‘quvchining sog‘ligi talabga javob berishi kerak. Ikkinchidan, bilim darajasi. Bilim darajasini sinash uchun mudofaa ishlari tomonidan diktant olinadi. Undan keyin, jismoniy tayyorgarligi, bir kilometrga hamda 60 metrga yugurish mashqlarini topshiradi”, — deydi u.
Litsey o‘qituvchisining qo‘shimcha qilishicha, o‘quvchining harbiy kasbga layoqatini aniqlash maqsadida psixologik test olinadi.
“Sinovlardan o‘tgan o‘quvchilarning hujjatlari mudofaa ishlari bo‘limlari tomonidan ‘Temurbeklar maktabi’ga yuboriladi. So‘nggi bosqichda o‘quvchilar Davlat test markazi tomonidan belgilab berilgan test imtihonlaridan o‘tadi”, — deydi Islom Inoyatov.
Ta’kidlanishicha, 2021/2022-yilgi o‘quv yili uchun respublika bo‘ylab “Temurbeklar maktabi”ga 1250 tadan ortiq hujjat kelib tushgan. Shundan 100 nafar o‘quvchi o‘qishga qabul qilingan.
“Bu yerda o‘zimdek ahdi qat’iy tengqurlarim ko‘p ekan. Men ‘Temurbeklar maktabi’ga bir necha imtihonlardan, sinovlardan saralanib muvaffaqiyat bilan o‘tdim. ‘Temurbeklar maktabi’da bizlarning puxta bilim olishimiz va jismoniy chiniqishimiz uchun Milliy gvardiya qo‘mondonligi tomonidan shart-sharoitlar yaratib berilgan. Bu sharoitlardan biz ‘Temurbeklar’ samarali foydalanib, O‘zbekiston xalqiga, prezidentiga sadoqat bilan xizmat qilamiz”, — deydi litsey o‘quvchilaridan biri Ilg‘orjon Karimov.
Mehribonlik uylari tarbiyalanuvchilarini hayotga tayyorlash, kelgusida o‘z yo‘lini topishga qaratilgan davlat siyosatini ijrosi sifatida mazkur litseyga joriy o‘quv yilida 10 nafar mehribonlik uylari tarbiyalanuvchilari qabul qilingan.
Ma’lumot uchun, litsey bitiruvchilariga oliy ta’lim muassasalariga kirishda qator imtiyozlar ko‘zda tutilgan. Xususan, oliy harbiy bilim yurtiga kirmoqchi bo‘lgan o‘quvchilarga testda yig‘gan ballining 30 foizi, fuqarolik oliy o‘quv yurtlariga kirmoqchi bo‘lgan o‘quvchilarga testda yig‘gan ballining 15 foizi qo‘shiladi. Shuningdek, litsey bitiruvchilariga haydovchilik guvohnomasi ham beriladi.
O‘zbekiston prezidenti, Qurolli Kuchlar Oliy Bosh qo‘mondoni Shavkat Mirziyoyev 7-yanvar kuni “Temurbeklar maktabi”da Amir Temur merosini o‘rganish markazida yoshlar bilan suhbatda shunday degan edi:
“Mana shunday ilg‘or maktabda o‘qiyotganingiz bilan sizlarni, ota-onalaringizni tabriklayman. Sizlar yangi O‘zbekistonning qanotisizlar. Bu qanotlar nima bilan kuchli bo‘ladi? Bilim bilan! Kamida ikki-uchta tilni, aniq fanlarni va tariximizni mukammal bilishingiz kerak. Mana, bu maktabda psixologiya fanini ham kiritdik, uniyam yaxshi o‘rganing. Sizlarda hamma imkoniyat bor”.
