Barcha iqtisodiy kompleks rahbarlari va hokimlarning kelgusi besh yildagi eng ustuvor vazifasi – yalpi ichki mahsulotni 100 milliard dollardan oshirib, sanoat mahsulotlari ishlab chiqarishni 1,4 baravarga ko‘paytirish va kambag‘allik darajasini kamida 2 baravarga qisqartirishdan iborat bo‘lishi zarur. Bu haqda Prezident Shavkat Mirziyoyev boshchiligida o‘tkazilayotgan yig‘ilishda ma’lum qilindi, deya xabar qilmoqda “Daryo” muxbiri.

Moliya vazirligi va Markaziy bank 2022-yilda inflyatsiya darajasini 9 foizdan oshirmaslik bo‘yicha barcha zaruriy choralarni ko‘rishi lozimligi ta’kidlandi.

Shu bilan birga, 2022-yilda oilaviy tadbirkorlik dasturlari doirasida 10 trillion so‘m kreditlarni “mahallabay” kafolatli manzillarga yetib borishini ta’minlash kerakligni qayd etdi.

Moliya vazirligi va Markaziy bank budjet taqchilligini yalpi ichki mahsulotga nisbatan 3 foizdan oshirmasligi shartligi belgilandi.

Mas’ullar yangi yerlarni o‘zlashtirish, suv tejovchi va raqamli texnologiyalarni joriy qilish, ilm-fan va innovatsiyalar orqali, dehqon va fermerlar daromadini kamida 2 baravarga oshirib, agrar tarmoqda yillik o‘sishni kamida 5 foizga yetkazishi lozimligi bo‘yicha topshiriq berildi.

Tashqi savdo va investitsiyalar vazirligiga tarmoq va hudud rahbarlari bilan birga, iqtisodiyotga besh yilda 120 milliard dollar, shu jumladan, 70 milliard dollar xorijiy investitsiyalar jalb etish, eksport hajmini yiliga 30 milliard dollardan oshirishi shart.

“Tasavvur qiling, bu qanday raqam?! Investorlarni ishontirdik, qanchasi kelib bizga xayrixohlik bildirmoqda”, – deydi prezident.

Davlat rahbari mas’ullarga neft-kimyo sanoatini rivojlantirish bo‘yicha alohida topshiriq berdi.

“Ko‘ryapsizlarmi, biz o‘z oldimizga qanday ulug‘vor marralarni qo‘ymoqdamiz. Eng muhimi, bu ulkan vazifalarni hamon davom etayotgan pandemiya va global inqiroz sharoitida amalga oshirishga to‘g‘ri keladi. Bu bizdan katta kuch va mablag‘, yuksak iroda va qat’iy intizomni, barcha kuch-imkoniyat va resurslarimizni to‘la safarbar etishni talab etadi”, – deydi Shavkat Mirziyoyev.