Ansu Fati jarrohlik amaliyotidan bosh tortdi va ertaroq safga qaytadi. “Barselona” operatsiyani xohlagandi

“Barselona” Ansu Fatining operatsiya qilinmasligini tasdiqladi.

“Ansu Fati chap sonining jarohatini tiklash uchun konservativ davolash usulidan foydalanadi”, — deya xabar beradi jamoa matbuot xizmati.

“Barselona” shifokorlari futbolchiga jarrohlik amaliyotini tavsiya qilgandi, ammo Fati va futbolchining oilasi buni rad etgan.

Agar Ansu operatsiyaga rozi bo‘lsa, 4 oydan 6 oygacha safdan chiqishi mumkin edi. Konservativ davolash usulida tuzalish muddati 6-8 haftani tashkil etadi.

Kataloniyaliklar hujumchini jarohatdan tezkor tiklanishga majburlamoqchi emas. AS jurnalisti Xavi Migelning xabar berishicha, “ko‘k-anorranglilar” shoshmaydi, 19 yoshli futbolchining safga qaytishi sun’iy ravishda tezlashtirilmaydi.

Ushbu yondashuv tufayli Fati 10 haftani o‘tkazib yuboradi. Hujumchi Madridda ishonchli fizioterapevt nazoratida bo‘ladi.

Ispaniyalik futbolchi 2021/22-yilgi mavsum La Ligada 5 o‘yinda 3 ta golni o‘z hisobiga yozdirib qo‘ygan.