Ijtimoiy tarmoqlar orqali maktablarda o‘quv jarayoni vaqtinchalik onlayn shaklga o‘tgani sababli muassasalardagi isitish tizimi o‘chirib qo‘yilgani, vaholanki o‘qituvchilar maktabda o‘zining majburiyatlari bilan bog‘liq faoliyatni davom ettirayotgani aytilgan murojaatlar kelib tushdi. Xalq ta’limi vazirligi holatga munosabat bildirdi.
Qayd etilishicha, Xalq ta’limi vaziri o‘rinbosari Ibrohim Jo‘rayev maktablarda issiqlik ta’minotini uzluksizligini ta’minlash yuzasidan ZOOM platformasi orqali hududlardagi mas’ullar bilan videokonferensiya orqali tezkor yig‘ilish o‘tkazgan. Vazir o‘rinbosari maktablarda ish faoliyatini amalga oshirayotgan o‘qituvchilarga zarur shart-sharoitlarni yaratish choralarini ko‘rish bo‘yicha ko‘rsatma bergan.
Jumladan, barcha maktablar kuz-qish mavsumiga tayyorligi, sinf xonalarini isitishga barcha zarur vositalar mavjudligi bois maktablarda isitish tizimini uzluksizligini ta’minlashga viloyat boshqarma boshliqlariga shaxsan mas’ul ekanliklari qayd etilgan.
Eslatib o‘tamiz, 7-yanvar kuni O‘zbekistonda koronavirusning omikron shtammi aniqlangandi. Shu sababli Respublika maxsus komissiyasining qarori bilan 15-yanvardan boshlab mamlakatda bir qator cheklovlar joriy etildi. Jumladan, turli tadbirlar tashkil etish taqiqlandi, emlanmagan xodimlar ishga qo‘yilmaydi. Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi. O‘zbekiston aeroportlarida koronavirusga qarshi majburiy test topshirish joriy etildi. Shuningdek, maktablar 24-yanvardan boshlab bir oy davomida onlayn faoliyat olib boradi.
Mavzuga doir:
Izoh (0)