Respublikaning barcha hududlarida 24-yanvar, dushanba va keyingi ikki kun davomida biroz shamol bilan, asosan, kam bulutli va quruq ob-havo saqlanib turadi, deb xabar bermoqda “O‘zgidromet”.
Qayd etilishicha, kechalari va ertalabki soatlarda 0-3 daraja sovuq, ba’zi joylarda 5 darajagacha sovuq atrofida bo‘lgan manfiy harorat saqlanib turadi. Kunduz kunlari quyosh nurlari havoni isitadi, ammo harorat 5-8 daraja iliqdan oshmaydi. Shimolda kechalari 6-9 daraja sovuq, kunduz kunlari 3 daraja sovuq-2 daraja iliq bo‘ladi.
Haftaning ikkinchi yarmida havo biroz ko‘tariladi, respublika hududining katta qismida harorat kechalari 0-5 daraja iliq, kunduz kunlari 8-10 daraja iliq, ba’zi joylarda 12 darajagacha iliq atrofida bo‘ladi.
28-yanvar, juma kuni O‘zbekistonning barcha hududlarida (Farg‘ona vodiysidan tashqari) yomg‘ir yog‘adi, shimolda va respublikaning tog‘li hududlarida yomg‘ir va qor ko‘rinishidagi yog‘ingarchilik bo‘ladi.
Tog‘li hududlarda qor ko‘chishi xavfi saqlanib turadi. Eslatib o‘tamiz, O‘zbekistonning tog‘li hududlarida 28-yanvargacha qor ko‘chish xavfi mavjud.
Izoh (0)