24-yanvar kuni Xalq deputatlari Farg‘ona shahar kengashining navbatdan tashqari sessiyasi bo‘lib o‘tdi, deb xabar beradi “Daryo” muxbiri.
Ma’lum qilinishicha, sessiya ishida viloyat hokimi Xayrullo Bozorov, shahar kengashi deputatlari, viloyat va shahar hokimlarining o‘rinbosarlari, sektorlar, boshqarma va tashkilotlar rahbarlari, mahallalar raislari, jamoatchilik faollari, OAV vakillari ishtirok etgan.
Sessiyada so‘z olgan Xayrullo Bozorov shahar hokimi vazifasida ishlab kelgan Mirzohid Ubaydullayev Iqtisodiy taraqqiyot va kambag‘allikni qisqartirish vazirining o‘rinbosari – Mahallabay ishlash va tadbirkorlikni rivojlantirish agentligi direktori lavozimiga tayinlangani, sobiq shahar hokimi faoliyati samarali bo‘lgani, unga katta ishonch bildirilganini aytib o‘tgan.
Viloyat rahbari, shuningdek, Farg‘ona shahridagi o‘zgarishlar, imkoniyatlar, qilingan ishlar va oldinda turgan vazifalar haqida ham to‘xtalib o‘tgan. Sessiyada Xayrullo Bozorov Vosiljon Nazarov nomzodini Farg‘ona shahar hokimi lavozimiga tavsiya qilgan.
“Tashabbuskor, izlanuvchan rahbar, befarq emas, harakatchan, fidoyi, yosh kadrlardan biri”, — deydi viloyat hokimi.
Ma’lumot uchun, Vosiljon Nazarov 1984-yil Buvayda tumanida tug‘ilgan. Toshkent davlat iqtisodiyot universitetini tamomlagan. 2006-yildan moliya tizimida mehnat qilib kelgan, 2019—2021-yillarda viloyat moliya bosh boshqarmasi boshlig‘i, 2021-yildan Bag‘dod tumani hokimi lavozimida faoliyat yuritib kelayotgandi.
Avvalroq Xalq deputatlari Bag‘dod tumani kengashining 24-yanvar kuni bo‘lib o‘tgan navbatdan tashqari sessiyasida Yusufjon Xusainov Bag‘dod tumani hokimi etib tayinlangani to‘g‘risida xabar berilgandi.
Mavzuga doir: Yunusobod tumaniga yangi hokim tayinlandi
Izoh (0)