Moskva sudi The Infraud Organization xakerlar guruhining asoschisi deb hisoblangan Andrey Novakni hibsga oldi. AQShda u kiberfiribgarlikda ayblanib qidiruvda edi, deb yozadi “TASS”.

Foto: “TASS”

Xakerlikda gumon qilingan yana uch kishi uy qamog‘iga olindi. Agentlik manbasining qayd etishicha, Rossiya maxsus xizmatlari jinoyatchilarni AQSh huquq-tartibot idoralari ko‘magida topgan.

Ishda ayblanuvchilar kompyuter ma’lumotlariga noqonuniy kirish va to‘lov vositalarini noqonuniy aylantirish moddalari bilan ayblanmoqda.

Yana bir manbaning “TASS” agentligining aytishicha, Rossiya Novakni AQShga ekstraditsiya qilmoqchi emas. “Rossiya qonunchiligi o‘z fuqarolarini xorijiy davlatga ekstraditsiya qilishni taqiqlaydi”, — dedi manba. Shu bilan birga, uning so‘zlariga ko‘ra, agar hibsga olingan guruh a’zolari orasida Rossiya fuqaroligiga ega bo‘lmagan ayblanuvchi bo‘lsa, “Rossiyada jinoyat ishi tergov qilinib, sudda ko‘rib chiqilgach, sudlanuvchi unga nisbatan ish ochilgan davlatga ekstraditsiya qilinadi”.

2018-yil fevral oyida AQSh Adliya vazirligi dunyoning turli burchaklaridan kelgan 36 kishini, jumladan, Andrey Novakni The Infraud Organization guruhida ishtirok etishda aybladi. AQSh rasmiylariga ko‘ra, guruh o‘z faoliyati davomida 530 million dollar zarar yetkazgan.

2021-yil mart oyida AQSh bir necha yil avval Tailandda hibsga olingan 33 yoshli rossiyalik Sergey Medvedevni o‘n yillik qamoq jazosiga hukm qildi. AQSh hukumatiga ko‘ra, u ham The Infraud Organization asoschilaridan biri bo‘lgan; sud jarayoni davomida Medvedev o‘z aybiga iqror bo‘ldi.

Eslatib o‘tamiz, 14-yanvarga o‘tar kechasi Ukraina hukumati veb-saytlariga keng ko‘lamli xakerlar hujumi uyushtirildi. Ukraina xavfsizlik xizmati ma’lumotlariga ko‘ra, jami 70 ga yaqin veb-saytlar, jumladan, Ukraina Tashqi ishlar vazirligi va Ta’lim vazirligi manbalari ham hujumga uchragan. Ukraina Raqamli transformatsiya vazirligi kiberhujumga Rossiyaning aloqadorligi haqida dalillar borligini ma’lum qildi.

Ukraina hukumati saytlariga qilingan hujumlardan so‘ng, Yevropa Ittifoqi mamlakatlari 15-yanvar kuni kiberhujumlarga qarshi kurash bo‘yicha olti haftalik mashg‘ulotlarni boshladi.