Germaniya harbiy-dengiz kuchlarining rahbari, vitse-admiral Kay-Axim Shyenbax Qrim hech qachon Ukrainaga qaytmasligi haqida aytgan gaplaridan keyin iste’foga chiqdi.
“Federal mudofaa vaziridan meni zudlik bilan harbiy-dengiz kuchlari rahbari lavozimidan ozod etishni so‘radim”, — deyiladi harbiy-dengiz kuchlari matbuot markazi bayonotida.
Mudofaa vaziri Kristina Lambrext vitse-admiralning arizasini qabul qildi.
Shyenbax Hindistonning Manohara Parrikara mudofaa tadqiqotlari institutida bo‘lib o‘tgan anjumanda shunday degandi: “Qrim yarim oroli Ukraina tasarrufida emas, u hech qachon qaytib kelmaydi, bu haqiqat”.
Shundan so‘ng Ukraina Tashqi ishlar vazirligi Germaniya hukumatidan harbiy-dengiz kuchlari rahbarining so‘zlarini rad etishni talab qildi. Vazirlik matbuot kotibi Oleg Nikolenkoning so‘zlariga ko‘ra, bu “Ukrainaning suvereniteti va hududiy yaxlitligiga hamda Yevropadagi xavfsizlik bilan bog‘liq vaziyatni yumshatish harakatlariga putur yetkazadi”.
Nikolenko Shyenbaxning bayonotlarini “mutlaqo qabul qilib bo‘lmaydigan” deb atadi hamda “Ukraina va hamkorlarining qat’iy sa’y-harakatlari bilan” yarim orol Ukrainaga qaytishiga ishonch bildirdi.
Germaniyaning Ukrainadagi elchisi Anka Feldguzen mamlakat tashqi ishlar vazirligiga chaqirildi.
Germaniya Mudofaa vazirligi Shyenbaxning so‘zlari vazirlikning rasmiy pozitsiyasini aks ettirmasligini ma’lum qildi. “Ushbu bayonotlar mazmun va shakl jihatidan vazirlik pozitsiyasiga hech qanaqasiga mos kelmaydi”, — dedi vazirlik vakili “TASS”ga. Uning qo‘shimcha qilishicha, Shyenbaxga bundesver bosh inspektori Eberxard Zorn oldida “mulohaza bildirish imkoni beriladi”.
Yanvar oyi boshida Ukraina sobiq mudofaa vaziri va prezidentlikka sobiq nomzod Anatoliy Gritsenko mamlakat “vaqtinchalik bosib olingan hududlarni” qaytarib ololmasligini aytgandi.
2021-yilning avgust oyida Kiyevda Qrim platformasi sammiti bo‘lib o‘tdi, unda yarimorolni Ukrainaga qaytarish masalasi muhokama qilindi. Tadbir ishtirokchilari qo‘shma yakuniy deklaratsiyani qabul qildi, unda Moskvaga bosimni jumladan cheklovchi harakatlar orqali davom ettirish rejalari e’lon qildi. Shuningdek, ular Qrimning “noqonuniy bosib olinishini tan olmaslik” siyosatini davom ettirishga kelishib oldi.
Qrim 2014-yilda referendum natijasida Rossiya tarkibiga kirgan. Ukraina va G‘arb davlatlari rasmiylari ovoz berish natijalarini tan olmaydi. Rossiya yarim orolga egalik masalasini yopiq deb hisoblaydi.
Izoh (0)