Afg‘oniston g‘arbidagi Hirot viloyati markazi Hirot shahrida 22-yanvar kuni kechqurun mikroavtobus portladi. Oqibatda yetti kishi halok bo‘ldi, yana o‘n kishi jarohatlandi. Bu haqda mahalliy hukumatga tayanib, “Interfaks” xabar berdi.
Afg‘oniston davlat axborot agentligi Bakhtar Hirot kasalxonasi bosh shifokori Muhammad Orif Jaloliyga tayanib, halok bo‘lganlarning to‘rt nafari va yaralanganlarning besh nafari ayol kishi ekanini xabar qildi. O‘n nafar jabrlanuvchining barchasi kasalxonaga yotqizilgan.
Afg‘on matbuotiga ko‘ra, fojia viloyat markazidagi Hoji Abbos aholi punktida sodir bo‘lgan. Ijtimoiy tarmoqlarda mahalliy jurnalistlarning xabar berishicha, bolalar, jumladan, yosh qizlar ham jabrlangan. Qayd etilishicha, yaradorlardan ba’zilarining ahvoli og‘ir, shu bois qurbonlar soni ortishi mumkin.
Mamlakatda faoliyat yuritayotgan qurolli guruhlarning hech biri sodir bo‘lgan voqea uchun javobgarlikni o‘z zimmasiga olmagan.
Avvalroq Kobuldagi shifoxonada portlash sodir etilgandi. Hodisa oqibatida kamida 15 kishi halok bo‘lgan.
15-oktabr kuni Afg‘onistonning Qandahor shahrida joylashgan shialar masjidida portlash sodir etilgandi. Hodisa qurbonlari soni 62 kishiga yetgan. Undan bir hafta oldin, 8-oktabr kuni mamlakat shimolidagi Qunduz shahrida yana bir shialar masjidida portlash yuz bergan. O‘shanda Frans-Press agentligi manbalarga tayanib, kamida 50 kishi qurbon bo‘lgani va 140 kishi yaralanganini xabar qildi. Aamaj News hodisaga oid videomateriallar, shuningdek, guvohlarning ko‘rsatmalariga tayanib, portlashda 100 ga yaqin odam halok bo‘lgani haqida yozgan.
Izoh (0)