Samarqandda “Bir million dasturchi” loyihasida birinchi o‘rinni olgan o‘quvchiga ishlatilgan noutbuk sovg‘a qilingani to‘g‘risida xabar berilgandi. Samarqand viloyati hokimi Erkinjon Turdimov ayni paytda o‘tayotgan viloyat Kengashi sessiyasida mazkur holatga munosabat bildirib o‘tdi, deb xabar beradi Zarnews.
“Mana shu masalani ko‘tarib chiqqan jurnalist va blogerlarga, rahmat. Bundan rahbarlar xulosa qilishi kerak. Tanqid qilgan odamni yomon ko‘rish kerak emas, ko‘tarilgan muammoni hal etishi lozim. Tanlovni o‘tkazishga mas’uliyatsizlik bilan yondoshgani uchun tuman hokimining yoshlar siyosatiga mas’ul o‘rinbosariga dastlab hayfsan, berilgandi. Ammo kecha vazifasidan ozod etdik.
Bunday tadbirlarni soxta obro‘ orttirish, kimlargadir yaxshi ko‘rinish uchun o‘tkazmaslik kerak”, — deydi Turdimov.
Avvalroq Nurobod tumani hokimining farmoyishi bilan IT-tanlovda g‘olib bo‘lgan yoshlarni taqdirlashda mas’uliyatsizlikka yo‘l qo‘ygani uchun hokimning yoshlar siyosati, ijtimoiy rivojlanish va ma’naviy-ma’rifiy ishlar bo‘yicha o‘rinbosari Navro‘zbek Jaloliddinovga nisbatan Mehnat kodeksining 181-moddasi (intizomiy jazolar) 1-bandiga asosan hayfsan intizomiy jazosi qo‘llanilgandi. Keyinroq u ishdan bo‘shatilgani ma’lum bo‘ldi.
Shuningdek, Nurobod tumani Xalq ta’limi bo‘limi ta’lim jarayoniga AKTni joriy etish sho‘basi bosh mutaxassisi Asliddin Dangalov bilan tuzilgan mehnat shartnomasi ham 17-yanvardan e’tiboran bekor qilingan. Keyinchalik IT Park g‘olibga berilgan noutbuk yangisiga alishtirib berilganini ma’lum qildi.
Izoh (0)