Jizzax viloyati G‘allaorol tumanida 19-yanvar kuni kuchli shamol ayrim ignabargli daraxtlarni ildizi bilan qo‘porib tushirdi, deb xabar qilmoqda Telegram’dagi “UzbMeteo” kanali.
Qayd etilishicha tumanning Qo‘ytosh ShFY hududida esgan kuchli shamol noyob turdagi 25 ta archa daraxtlarni yiqitgan.
“O‘zgidromet”ning “G‘allaorol” kuzatuv stansiyasida 19-yanvar kuni soat 12:30 da g‘arbiy yo‘nalishdagi shamol tezligi 12 metr/sekund, kuchayganda 25 metr/sekund tezlikda esgan.
Avvalroq “O‘zgidromet” 19-yanvar, chorshanba kuni qanday ob-havo kuzatilishini ma’lum qilgandi. Unda “Jizzax viloyatida havo o‘zgarib turadi, yomg‘ir yog‘adi, ba’zi joylarda qorga aylanishi mumkin. Shamol g‘arbdan 7-12 metr/sekund tezlikda esadi, ba’zi joylarda 17-22 metr/sekundgacha kuchayishi mumkin. Harorat kechasi va kunduzi 3-8 daraja iliq bo‘ladi”, deyilgan edi.
Izoh (0)